長期糧尾?! 旺角/觀塘/新蒲崗 $36嫩滑油香海南雞飯

·2 分鐘文章

每逢糧尾都特別手緊,食餐晏仔都要精打細算,盡量食平啲啲。不過而家啲餐廳食個晏,閒閒地都要40幾50蚊!所以邊度有平價飯堂,打工仔必須要mark實!呢間主打泰式海南雞飯嘅餐廳,喺旺角、觀塘同新蒲崗都有分店,一個飯$36,飯量十足包食飽,絕對係糧尾救星。

泰式海南雞飯$36
泰式海南雞飯$36

雖然定價親民,但用料同製作一啲都唔馬虎。餐廳選用三黃雞製作泰式海南雞飯,先將原隻三黃雞放入加咗香茅、斑蘭葉同檸檬葉嘅湯水入面熬一個鐘;油飯用泰國香米,又會放入混入多種泰國香料,如乾葱、香茅等嘅雞湯內浸過。所以煲出嚟嘅油飯,香茅味重,雞肉亦嫩滑,點埋自家調製嘅醬汁,酸甜帶辣,係幾開胃。

泰式豬手飯$36
泰式豬手飯$36

豬手飯都係$36,豬手用上超過15種香料,同埋泰國師傅自用逾4年嘅滷水膽炆焗3個鐘以上,相當入味,豬手口感軟腍。配埋自家炒嘅酸菜,可以解解油膩感。跟埋隻流心蛋冇得輸。

 Grandma 咖喱牛腩飯$36
Grandma 咖喱牛腩飯$36

至於咖喱牛腩飯,牛腩軟腍入味,咖喱汁都係自家調製,辣就唔係好辣,椰香味好濃郁。原來係以超過8種香料製作,而且只係用椰汁,冇加水咁煮成!幾個飯嘅餸料都唔算話好多,以飯量搭夠。

 芒果糯米飯 $18
芒果糯米飯 $18

好多人都鍾意食嘅芒果糯米飯,質素都唔錯,雙色糯米飯口感軟糯,椰香十足。

粉紅水門雞
分店:旺角新蒲崗觀塘

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能