雅虎香港新聞 【長沙灣美食】失業爸爸為養家開意粉店！自創車仔麵式意粉剔紙仔揀配料
政府統計處公布，2月至4月經季節性調整失業率為5.2%，創逾十年新高。重災區飲食業，「有工開已經要還神啦」已成同行間之問候語。今年32歲的Steven也不例外，18歲紅褲子入行，不是廚師，主力樓面。做過米芝蓮2星法國餐廳，做過星級酒店，也做過高檔意菜，職級已達經理，連餐廳menu，新舖選址他也有份參與。「又點估得到，個女出世幾個月，我就突然被炒？」Steven說時不無感觸。
【立即讚好】全新 Yahoo Food Facebook 專頁
搬了屋 失了業
Steven 是名標準愛妻號，夫妻二人婚後一直想有下一代，組織美滿家庭。但見太太身體狀況不算理想。就算他每月入息不算十分充裕，也仍然想老婆辭工休養。結果也真的求仁得仁，順利誕下囡囡。「當時在灣仔一間高檔意大利餐廳做經理，收入穩定，拍檔也合作多年。條件足夠我去support屋企，所以先會決定生小朋友，租新屋，地方大啲，也預備好了小朋友的各種開支。」
萬萬想不到，經濟在半年間插水，社會不穩加上疫情致命的衝擊，「我仲好記得，係今日通知我被解僱，即刻就要執嘢走。當刻難受到……成個人呆咗。」Steven說，難受歸難受，第一時間湧現的想法是「我點同老婆交代？我返屋企應唔應該講？我應該點講？」
由經理 變 大廚
男人之苦，自己吃，不緊要，但「有頭家去撐，其實無時間去苦，無時間唔開心。」擦乾眼淚還是要趕路，但其時正值3月，疫情最嚴峻之時，政府實行限聚令，酒吧被迫關門，不少餐廳也索性關門一陣：「日日打電話，周圍問朋友，但唔好話長工，連炒散都唔請。」無車牌的他甚至應徵過外賣app公司做「步兵」速遞員。
日復日等通知，幸好曙光來得及時，在朋友介紹下，得知長沙灣一food court入場費較低，一直喜歡下廚的他決定一試自己做店主：「我接觸西餐多，睇得多試得多，都會知道用料及少少秘訣。」至於開意粉店，也是他的小小夢想：「以車仔麵方法賣pasta，其實我已經諗咗好耐，一直想實行。」事急馬行田，個多月內鑽研意粉煮法，找朋友試味，改良，籌備好，就立刻開店。
自製青醬夠誠意
所謂餐廳，其實是美食廣場內一間小店，枱枱櫈櫈是公家共用。至於餐單，清一色是pasta，共6款已配搭好的意粉，4款小食，再加上Steven自創的「車仔麵」式意粉，客人可以剔紙仔揀心水配料，自己配搭。食物沒有驚為天人，賣的是物有所值，簡單的忌廉白汁、茄醬、青醬，都是他自製，不用來貨。特別是青醬(pesto sauce)，松子仁自己炒，配羅勒一同打爛，開成醬，炒上意粉，已經香得不能。
香港人最愛的卡邦尼也賣得很好，「蛋黃和忌廉的比例最重要，意粉也不可以烚到熟透才上碟，讓餘溫自己煮就好。」意粉平均$50/份，份量多，又足料，縱使宣傳不多，靠街坊口碑也慢慢累積回頭客。現時餐廳生意穩步上揚，對比起開業頭個多月，平均每日賣少於10個意粉。Steven笑言雖然已經工作2個月無放過1日假，但「個心終於定返小小」。
賺了天倫樂
自身無宗教信仰的Steven說，今次經歷有點「塞翁失馬」之感：「上天關了一扇門，必定會再為你打開另一扇窗」。失去了穩定工作，卻意外換來更多與老婆及囡囡的天倫樂：「以前返屋企最早都要12點，太太已經瞓了。但現在，及早完成工作，10點幾就回家，仲趕得切同佢傾下計，陪下bb。」在這風雨飄搖的時代，每個父親最想得到的父親節禮物，其實只是一種家的安穩。
意粉攻略
地址：長沙灣青山道413號東景大廈1樓創食薈8號舖(地圖按此)
電話：65743400
更多長沙灣美食推介
【長沙灣美食】打卡文青Café推介5間！純素蛋糕+柴犬咖啡+玫瑰千層蛋糕
