【長駐新角色？】王子涵加盟《愛·回家》演秘書 角色造型向陳慧嫻致敬

無綫處境劇《愛·回家之開心速遞》深得觀眾愛戴，唔少劇中演員更憑角色成功入屋。劇集不時都會有全新角色加入，每次都會引起觀眾關注，繼早前嘅歐陽震華、姜麗文、陳煒及馮盈盈等人後，喺前晚嗰集亦有新演員登場，而呢個人就係王子涵（Dada）。

王子涵喺劇中飾演「送水輝」宋瑞輝（許家傑飾）嘅女秘書蔡玉皎，劇情就講到送水輝答應出任接龍集團餐飲部總監，秘書方太（方伊琪飾）亦準備退休，於是佢就需要招聘新秘書。大小姐（林淑敏飾）與送水輝及Rebecca（沈可欣飾）一齊接見應徵者，點知佢哋個個都樣靚身材正，大小姐當然唔會俾佢哋接近輝輝，所以最後揀咗打扮奇特、講野又直率嘅蔡玉皎。但原來蔡玉皎係三太白天娥（樊亦敏飾）個仔Joe嘅女友，白天娥想要佢入接龍剌探軍情。傻大姐性格嘅蔡王皎好似唔係好明三太嘅意思，好似噚晚嗰集三太打算破壞大小姐嘅生日派對，希望蔡玉皎用Max（鄭世豪飾）嘅電郵訂大隻猛男，點知蔡玉皎就訂咗真係食得嘅猛男鴨。

其實蔡玉皎嘅造型係啟發自八十年代女歌手，佢有講過自己同父母一樣喜歡「陳為顏」，同佢個首歌《傻瓜》。明眼人都知佢係講緊陳慧嫻同佢個首《傻女》，而且蔡玉皎造型同當年陳慧嫻《跳舞街》時期一樣都好色彩鮮艷及浮誇，連王子涵都話「其實我真係好鍾意呢個造型。」。

現年30歲嘅導演王晶愛女王子涵，於倫敦藝術大學化妝及髮型形象設計系畢業。07年就加入娛樂圈，第一套接拍嘅電影就係爸爸嘅《七擒七縱七色狼》，之後亦有參與其他電影《甜心粉絲王》、《功夫點心》及《黑勢力》等等。除咗電影工作之外，王子涵喺15年加入無綫，開始參與唔少綜藝節目及劇集拍攝，當中佢喺爸爸有份投資嘅劇集《荷里活有個大老千》擔任女主角「缽仔糕」，有不俗嘅表現，獲得唔少觀眾讚賞。今次佢加盟《愛·回家之開心速遞》飾演秘書蔡玉皎，造型誇張加上角色性格非常討好，而佢嘅表現亦都不俗。被傳媒問到會唔會長駐劇組時，佢就賣關子咁表示監製要睇觀眾反應先決定。