開心速遞｜陳偉琪被雪藏後驚現愛回家外景現場 網民：細龍太快歸隊

陳偉琪（Vicky）因處境劇《愛·回家之開心速遞》「細龍太」一角成功入屋，不過舊年8月就因為涉醉駕被捕，保釋期間仲畀媒體影到佢繼續夜蒲飲酒，有傳無綫高層不滿而要雪藏佢。《愛·回家之開心速遞》8月初劇情交代「細龍太」已經搭飛機走咗，短期內都唔會返香港。之後，佢就再冇出現過，不過日前佢就喺外景現場出現，仲同劇中老公「細龍生」鄭世豪、奶奶蘇恩磁合照。

鄭世豪喺Facebook上載數張合照及留言話：「劇情巧遇三太。現場巧遇細龍太。」睇嚟係拍攝外景期間，陳偉琪咁啱經過探班；網民見到照片即時反應熱烈話好耐無見佢哋合照。

陳偉琪疑似被抽出劇組，之後一直喺司儀界發展，佢曾經接受訪問就講過自己做咗「細龍太」一角3年都好唔捨得，但只能夠等公司安排：「我跟你們一樣都掛住佢的！也想再看到她的！」而《愛·回家之開心速遞》監製林建祥當時就回應傳媒話「細龍太」只係劇情需要而暫時消失。不過到而家足足9個月都未見陳偉琪重返劇組，唔怪得好多網民都留言：「好掛念細龍太，希望快啲回歸」、「細龍太快歸隊」、「可惜你們仍未能團聚」、「Omg!!!好掛住Jenny啊….」等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！