關嘉敏要錢唔要仔 上車最實際

東方日報
·2 分鐘文章
關嘉敏睇完樓又睇名錶,睇嚟近期搵唔少。
關嘉敏睇完樓又睇名錶,睇嚟近期搵唔少。

關嘉敏近日接連代言廣告,即計劃買樓獎勵自己。鍾情頂樓連天台單位的她,自知暫時能力有限,退而求其次望覓得心水「上車盤」,早日為家人打造安樂窩。

歌手關嘉敏自從參加ViuTV《全民造星III》後贏得人氣,除曾被爆周旋於CY及天堂鳥Gordon的三角關係外,工作更是接踵而來。醒目的她向經理人公司「表白」,暫時寧要麵包不要愛情,好趁年輕努力搵錢,希望捱出頭來。

逛超市滿載而歸

近日她接下幾個廣告收入漸增,即計劃投資磚頭,改善家人及自己的居住環境。據悉,見首期儲得七七八八的她,即蠢蠢欲動四出睇樓,日前被發現與經理人現身尖沙咀街頭,駐足地產舖門外物色心水樓盤,並由地產代理帶她專攻間隔實用的二手單位。可能不想供得太吃力,她鎖定約700萬元的樓盤,明顯是想「先上車」再作打算。

約大半小時後,她與地產代理落樓,站在街頭雞啄唔斷,對方臨走前拋下一句「有好嘢再搵你」,似乎仍未扑槌。隨後她與經理人於附近windows shopping,經過一間名錶店即停步研究,與身邊一位陌生男齊齊「霸位」睇靚嘢,未幾再徒步往日式超市,滿載而歸。

擸棍落街被疑黐線

記者事後與關嘉敏取得聯絡,她直認開始睇樓:「不過其實我嘅dream house係頂樓連天台,村屋應該好啲。天台用嚟燒嘢食,兼且畀我耍棍練功夫。依家住嗰度冇地方,我試過攞棍落街練嘢,畀媽咪問我係咪黐線。我要練好啲拳腳,希望日後改走打女路線呀!」

身為士多啤梨控的關嘉敏攞起相關零食,又揀了大堆薯片。
身為士多啤梨控的關嘉敏攞起相關零食,又揀了大堆薯片。