關淑怡宣布退出娛樂圈 一文睇盡紅遍亞洲歌后人生重大事件

娛樂LOL
關淑怡
關淑怡

喺90年代紅遍亞洲嘅關淑怡(Shirley),噚日突然透過社交網站宣布退出娛樂圈,留言話自己好失望,係喺冇選擇下退出,見識到最醜陋的一面,仲話自己係一個人,唔係扯線公仔。早前Shirley已經向環球唱片發炮,有指今次決定退出嘅原因係大碟難產所致。一向我行我素嘅關淑怡出道至今超過30年,不如而家就同大家重溫一下佢嘅重大事件啦!

1986年

關淑怡參加《第五屆新秀歌唱大賽》,不過當時未能晉身決賽,所以佢就返美國做服裝設計師。

1988年

佢選擇轉戰日本,並喺當地參加歌唱比賽勇奪冠軍。比賽完結後,Shirley喺日本出道,之後先回流返香港。

1989年

關淑怡成為寶麗金力捧新人,《冬戀》係佢嘅首張專輯,當中嘅《叛逆漢子》及《冬戀》深受樂迷喜愛。同年推出第二張專輯《難得有情人》,同名歌曲《難得有情人》更奪得「十大勁歌金曲獎」。除咗多首歌曲都唱到街知巷聞之外,Shirley仲差唔多囊括頒獎禮嘅最有前途女新人獎,風頭一時無兩。

1995年

第一次舉行個人紅館演唱會。

1997年

關淑怡選擇淡出娛樂圈。

2001年

佢喺台灣復出,並未婚懷孕。

2002年
關淑怡與唱片公司和平解約,及誕下兒子關浚賢,當時Shirley就冇透露兒子爸爸嘅身份,直至2014年喺IG自爆囝囝生父係寧波車。

2005年

關淑怡再次復出。

2012年

關淑怡突然喺社交網站留言:「我想自殺!」隨後又再留言說﹕「不想活!一杯水冷暖自知!我問心無愧。所有人、樂壇、公司、朋友、同事、家人、記者!我能決定,我不會再回來。我不想再見任何今生與我有緣的人。除了我的兒子。」其後搵到經理人查證,好彩最後虛驚一場。

2014年

除咗自爆囝囝生父身份之外,關淑怡仲同助手鬧不和,喺社交網站公開助手嘅照片,指自己喺公眾地方俾佢辱罵,兼鬧爆對方冇大冇細。

2016年

關淑怡被發現喺愉景灣墮海,不過之後佢就澄清唔係情緒嘅問題,係飲大咗兩杯,喺行沙灘時失足墮海。

2017年
因為愉景灣嘅酒店政策突然有變,關淑怡就好擔心同囝囝唔可以繼續入住,與職員發生爭執,事後被控刑事恐嚇及普通襲擊罪。關淑怡承認普通襲擊罪,被判罰款2000元。

2018年

內地男星胡兵喺社交網站上載咗兩款唔同酒店嘅拖鞋相片,仲評論一下酒店服務。點知咁樣就觸動到關淑怡,Shirley仲喺社交網站24小時不停發文批評佢。之後胡兵嘅粉絲睇唔過眼,開始對佢人身攻擊,Shirley當然作出反撃,仲揚言要退出微博。

2019年

關淑怡曾經喺微博力撐黃耀明,仲話呢個係佢最後一個PO。喺年尾,有內地網民就發現佢嘅歌喺內地Apple Music全被下架,不過就唔知關唔關佢嘅言論事啦~

你可能還想看