阮兒突爆甩拖 衛志豪：唔太明白！

「無綫咪神」阮兒跟比她大13歲的衛志豪蜜運3年，發展到同居試婚階段，惟女方突然宣布回復單身，現忙搬離愛巢，更講明要豪買桃花重新「上市」；而男方疑蒙在鼓裏，一句「我都唔太明白」似遭「被分手」！

擁有34C上圍的阮兒昨日出席新店開張活動時，被問到藝人男友衛志豪時支吾以對，在連番追問之下才承認已甩拖：「新年、情人節都要工作同埋搬屋。（幾時分開？）都一段時間。（之前唔係感情穩定？）都好耐之前啦，哈哈！（有第3者介入？）冇嘅，和平分手，將來嘅嘢唔知，但暫時真係要冷靜吓先，依家都習慣1個人生活，我有好多朋友、工作。」新年買桃花旺一旺？她哈哈大笑：「我諗要買10棵先得！（想快啲有新戀情？）咁都係關人緣嘅，希望所有嘢都好！」

玩「SheShe」戀

她透露3月開拍無綫新劇《十八年後的終極告白2.0》以工作療情傷，將跟譚凱琪譜出「SheShe」戀：「之前公司覺得（演同性戀者）幾好就嚟多次。（有親熱戲？）唔知，但我希望有！（唔介意錫女仔？）男、女都唔介意，完全唔抗拒，讀書嗰陣身邊有好多朋友都係同性戀，私下玩都有錫過女仔。」又謂角色有少少變態，更搞笑話難保拍完都會變「SheShe」！

而衛志豪對女友公布分手一事，竟表現得不知情：「多謝關心，其實我都唔太明白！但不想講太多，請見諒！祝福她！」問到女方可有攤牌講分手及共識何時公開情斷一事？他說：「佢有權選擇，講同唔講，或者幾時講同喺邊度講！」

白雲經常被性騷擾

另外，35E「咪神」白雲與前港男老公江俊霖同場，剛從北京返港的她笑言另一半已習慣獨留香港，夫婦被邀合照時，她卻耍手擰頭。講到台灣宅男女神「雞扒妹」鄭家純自爆慘遭性騷擾，白雲自爆由細到大經常有這些遭遇，次次都絕不啞忍，覺得要嚴懲「鹹豬手」免再有受害者。