阿仔大整蠱 老豆生日包廣告牌賀壽 登埋電話號碼

19+

 

阿媽生日,做仔女多數醒水做足全套,點解?

你明嘅~~~

 

阿爸呢?唔……

 

以下呢位老豆,見到啲仔咁「有心」,真係唔知講咩好。

 

美國新澤西州嘅62歲阿叔Chris Ferry最近牛一,

佢2個仔好有愛,雖然身處一啲都唔近老家嘅佛羅里達州,

仍然為老豆送上驚喜︰

就係喺阿爸會經過嘅公路上,包起一個戶外廣告大牌,

寫上「祝你生日快樂」字句。

 

呢份禮物唔平,要成2000蚊美金(約港幣15500元)。

好sweet呀可?睇真啲,個大牌仲登埋老豆個手機號碼!!

 

於是, 壽星公Chris收到大量來電、短訊同佢祝壽。

係來自世界各地,連印度洋小島都有人打嚟!

 

電視台想打埋一份,都冇用。因為個留言信箱爆咗。

 

呢幾日有成15000個來電同短訊搵Chris,唔爆至奇!

 

Chris原來唔係第一次俾兩位「孝順仔」整蠱,

佢話2個仔細個嗰陣,出去餐廳食飯會同「昆」侍應,

話阿爸今日生日,麻煩唱生日歌佢聽。

 

難得老人家好buy,只不過要將留言信箱個開場白改一改︰

「多謝你打嚟祝我生日快樂……」

畢竟個告牌要到4月頭先至「落畫」,死未?!

而搞事嘅2兄弟就話,今年玩咁大,下年要超越有難度。

 

有得玩,老豆又開心,俾心機度下啦!

原文傳送門

你可能還想看