【阿嬌爆頭】藝人毀容事件簿 胡歌遇車禍留疤痕 亞視前藝人刺傷女星妻子臉龐

·3 分鐘文章

阿嬌鍾欣潼尋日喺廈門入住嘅酒店房內發生意外,去廁所時見暈撞爆右邊眉骨,傷口長達6cm,據知要縫幾十針!藝人靠樣搵食,一旦出事影響外表,隨時殃及星途。好在吉人自有天相,有藝人事後甚至人氣更勝從前。

寶珮如

前亞視藝人寶珮如1999年遇上嚴重車禍,盆骨碎裂之餘臉部更有多處骨折,7年間接受多次手術,面容改變之餘更出現財政問題,試過去快餐店打工謀生。好在寶珮如有好姊妹袁潔儀照住渡過難關,2011年更與任職廉政公署嘅男友閃婚。2018年寶珮如憑電影《藍天白雲》獲提名香港電影金像獎最佳女配角,隨後得到TVB邀請加盟,拍過舊年出街嘅《牛下女高音》,而家劇接劇!

韓君婷

1997年亞姐冠軍韓君婷,可算係歷屆亞姐之中最標青嗰批。2012年佢喺新加坡居住時,喺屋企浴室跌倒撼爆鼻,醫生喺佢肋骨度取出軟骨移植入鼻樑,傷口事後更加出現細菌感染,要去泰國再接受手術。由於鼻型有異,韓君婷經常被外界懷疑整容變靚。

胡歌

《瑯琊榜》男主角胡歌2005年出道時聲勢凌厲,一年拍3部劇,而且青靚白淨,絕對係少女頭號男神。但喺2006年,胡歌拍《射鵰英雄傳》時喺上海遇上嚴重車禍,右邊面傷勢嚴重,之後一年進行幾十次植皮、除疤、鼻骨矯正嘅手術。同車嘅女助理傷重死亡,司機重傷並負刑責入獄。

康復後嘅胡歌人氣依然強勁,多套古裝劇收視犀利﹐2015年嘅《瑯琊榜》更加係胡歌嘅代表作。細心睇劇的話,依然見到胡歌右眼皮上方嘅一道疤痕。

俞灝明

2010年10月,俞灝明同台灣女團S.H.E成員Selina(任家萱)喺上海拍攝劇集《我和春天有個約會》一場爆破戲,由於工作人員㩒掣時機出錯,俞灝明同Selina一齊被燒傷。Selina傷勢主要喺身體各處,臉部只有輕微灼傷,但俞灝明就冇咁好彩,面部同背部合共4成燒傷,更有傳因為呢場意外,俞灝明同當時嘅女友感情生變。復出後俞灝明要靠化妝遮蓋疤痕,但依然有好多演出機會。

戴良純

80年代台灣女星戴良純同香港亞視前藝人劉永結婚,有指劉永婚後對戴良純「郁手郁腳」,戴飛返台灣暫避,點知劉永追到去台灣之餘,仲用利器襲擊戴良純令佢毀容。事發後劉永被法庭判監2年半,但係劉永飛返香港潛逃多年,由於台港兩地冇引渡協議,劉因此可以逍遙法外,甚至喺刑事追訴期過後去台灣出席金馬獎。