阿Sir早晨｜林保全愛女林芷筠 童星出身女承父業做配音員

無綫喺上月頭開始重播3套當年偶像青春劇集，繼《撻出愛火花》及《當四葉草碰上劍尖時》後，喺今個星期一（5日）就重播1994年嘅《阿Sir早晨》，除咗有天王黎明、古天樂、宣萱、李綺虹及張慧儀之外，一班飾演學生嘅演員同樣備受關注，當中包括飾演學生妹宋美詩嘅林芷筠（Safina），其實佢就係已故「叮噹」配音員林保全嘅囡囡。

現年41歲嘅林芷筠，喺13歲已經開始入行做童星拍劇，飾演過嘅角色包括《再見亦是老婆》于仲文、《阿Sir早晨》宋美詩、《妙手仁心》周若晴及《烈火雄心》沈碧霞等等。雖然拍劇經驗相當豐富，不過做嚟做去都係做妹妹同囡囡角色，發揮空間唔算太大。佢喺2001年決定轉型到幕後工作，實行女承父業，投身配音行業，而代表作就係《喜羊羊與灰太狼》嘅「懶羊羊」。 林芷筠喺2017年約滿後便退出配音界，之後喺2018年以自由身身份配音，近年佢更為ViuTV播出嘅《姆明谷歷險記》系列嘅小美及電影《搖滾太空人》（Rocketman）嘅Sheila Dwight角色配音。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！