【陀槍師姐2021】滕麗名遇魏駿傑郭政鴻兩番感情受挫 嫁金融才俊成幸福人妻

上周開播嘅《陀槍師姐2021》卡士入面，能夠由前4輯延續落嚟嘅梗係有「陳三元」滕麗名。呢個角色可以話係阿滕嘅代表作，佢亦因為拍《陀槍師姐》而撻著魏駿傑，但係最終分手收場。之後又係拍劇遇著郭政鴻都係不歡而散，好在兜兜轉轉後搵到真命天子！

魏駿傑9年情玩完 分手後隔空罵戰被鬧「賤人」

1998年拍《陀槍師姐》前，滕麗名曾經同另一套有份劇集《真情》嘅幕後拍拖，分手後因為《陀槍》而同劇中男友魏駿傑戲假情真。不過當時有報導話，魏駿傑前一年先至同三級女星黃祖兒拍拖兼同居，懷疑有人見異思遷，黃祖兒更加爆料數舊愛不是，當中涉及性生活！

後來滕麗名魏駿傑一直穩定發展，魏駿傑都話已經談婚論嫁，不過2007年魏駿傑北上拍劇時，認識年輕20歲嘅女大學生張利華，迅即打得火熱。魏駿傑毅然放棄9年感情，宣布與滕麗名分手，並且喺拍拖一年後同張利華結婚，備受指責。

魏駿傑曾經喺訪問透露，同滕麗名拍拖多年，幕前又係扮演情侶，自言「唔同佢結婚我就係罪人」，然後又話拍拖多年情侶離婚率高，言論得罪唔少觀眾。但係兩個人嘅瓜葛未完，滕麗名曾經爆魏駿傑婚後有傳短訊要求復合，而魏駿傑就曾經喺微博鬧阿滕係「賤人」！

上年魏駿傑宣布同囡囡Jessica相依為命，加上張利華被影到同洋人搭上，受訪時魏默認離婚更聲稱「終生不娶」，提起同滕麗名一段情時話「咩債都還晒」，又祝福滕麗名一世都好。

拍劇撻著郭政鴻 拖拉多時

2007年同魏駿傑分手冇耐，滕麗名因為拍《野蠻奶奶決戰戈師奶》同拍檔郭政鴻撻著，二人收收埋埋玩地下情但係通行都知。後來有周刊影到，離過婚嘅郭政鴻原來已經再娶，仲要有個9個月大嘅女，被指一腳踏兩船。消息傳出後阿滕對外話同郭政鴻劃清界線，不過有周刊報導郭政鴻後來氹掂阿滕，仲喺女方香閨出入，最終2個人拖拖拉拉多一年之後仍然分手收場。

嫁金融才俊 日本跌傷老公緊張照料

受過2次情傷嘅滕麗名，2011年認識品牌高層朱建崑(Matthew)，當時Matthew被傳媒寫成花心男，但係2013年阿滕同Matthew修成正果拉埋天窗。婚後阿滕出力冧老公，煮飯照顧樣樣做足；而Matthew都係愛妻號，前年年尾阿滕喺日本旅行時跌傷肋骨要留醫，Matthew港日兩邊走照顧老婆令阿滕大為感動。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！