《陀槍師姐2021》昨晚首播 網民嫌首集沉悶兼膠味濃

·5 分鐘文章

《陀槍師姐》絕對係無綫經典系列作品,喺1998年至2004年間推出咗4輯,相隔17年後再推出續集《陀槍師姐2021》。今次劇集主角唔再係歐陽震華、關詠荷及蔡少芬,改由原班人馬滕麗名,加上宣萱、陳豪及羅子溢主演,風格亦同以往幾輯有所不同,加入唔少輕鬆搞笑元素。新劇《陀槍師姐2021》喺噚晚正式首播,想知網民睇完有咩感受,快啲轆落去睇下啦!

首集沉悶兼膠味濃
第一集講到女警戴安娜(宣萱飾)發夢夢見自己喺婚禮上前男友搶婚及未婚夫搞大咗人個肚,飛虎隊男神蒙漢森(陳豪飾)亂槍掃射三男並將佢拯救。佢去快餐店買早餐期間遇上挾持人質事件,蒙漢森要求同戴安娜裏應外合,雖然佢表現得騰騰雞雞,不過總算成功救回人質,點知又俾佢發現茶餐廳有炸彈,仲嚇到行唔郁,要蒙漢森抱佢離開現場。之後,劇情就講到蒙漢森與警司陳三元(滕麗名飾)成功搗破毒品交易。最後蒙漢森與戴安娜喺警署收到炸彈,戴安娜更嚇到不知所措。唔少網民睇完之後都話劇集好悶同好膠,例如:「無聊到爆」、「冇驚喜好無聊。 好尷尬」、「好爛!失望!」、「真係影衰陀槍師姐個招牌」、「好膠囉 喜劇mode無問題 唔該開過套 唔好抵毀陀槍回憶」、「好失望 膠劇」、「套嘢有濃烈的膠味」及「好大陣膠味」等等。

《陀槍師姐2021》劇照
《陀槍師姐2021》劇照

客串演員充滿驚喜
噚晚第一集已經有唔少演員驚喜客串,佢哋喺唔同情節出現,例如馬國明、胡鴻鈞及C君喺劇集開頭戴安娜(宣萱飾)婚禮夢境出現分別飾演搶婚前男友及新郎哥、飾演軍裝巡警嘅劉佩玥就想打聽新嚟梁sir(海俊傑飾)資料、飾演警司嘅李錦聯及安德尊喺開會期間好有火藥味咁傾海南雞飯等等。唔少網民睇完都感到好驚喜,紛紛留言話:「嘩.. 好驚喜..有馬季豪仔.. 好彩今晚有睇tvb」、「大王大戰李錦聯」、「有驚喜」、「啤啤都有份客串,降魔的3.0嗎」及「大王尊都有,估你唔到」等等。

《陀槍師姐2021》截圖
《陀槍師姐2021》截圖

主角太老
今次劇集搵嚟50歲宣萱、49歲陳豪、45歲滕麗名及36歲羅子溢主演,單單係佢哋嘅年齡加埋已經180歲,相比起啱啱播映完畢嘅《堅離地愛堅離地愛》龔嘉欣搭張振朗真係差好遠。唔少網民都嫌佢哋年紀太大,留言話:「嘩!成班主角老藝人塊面唔上粉」、「宣萱加滕麗名組合應叫陀槍師太」、「陳豪同宣萱老咗好多,似阿叔阿嬸」及「D男女主角加埋差唔多2百歲」等等。

《陀槍師姐2021》劇照
《陀槍師姐2021》劇照

宣萱有喜感但欠說服力
宣萱飾演觀察力強又平易近人嘅女警戴安娜,喺劇中充滿喜感,當中更自抽經常被綁架話:「我做咩要做人質,我個樣似人質咩,我唔會再做人質㗎,我死都唔會再做人質㗎啦!」唔少網民都話佢幾好笑及俾呢幕整笑咗。另外,喺第一集仲睇到佢擁有一顆少女心,佢視蒙漢森為男神,除咗夢見佢之外,喺被佢抱起時更表現出仰慕嘅眼神。不過網民們對於佢仲扮演呢類傻更更及容易春心動嘅角色唔多受落,留言話:「問題係宣萱真係太老..角色欠說服力..只feel到佢發老姣」、「宣萱唔係唔好戲 但要佢做少女角色又尷尬左啲」、「宣萱做返中女會順眼D,而家扮可愛好考驗我忍耐力。」及「其實呢,宣萱都一把年紀,搵佢做呢啲傻更更又發姣的角色,真係唔係最理想人選。」等等。

《陀槍師姐2021》截圖
《陀槍師姐2021》截圖

滕麗名戲份少到似客串
噚晚嗰集觀眾等完一節又一節,去到尾段終於有陳三元(滕麗名飾)出場,佢與蒙漢森講泰文並一起搗破毒品交易。不過佢嘅戲份真係唔多,唔講仲以為佢係客串,唔少網民都好失望咁留言話:「得番三元,戲份仲要咁小」、「戲份少到呢,唔講以為陳三元都係客串」及「呀滕出咁少???」等等。另外,亦有網民話佢喺劇中經常戚眉弄眼,陳三元變到好似熊尚善,搞到好似睇緊《愛.回家》咁。

《陀槍師姐2021》劇照
《陀槍師姐2021》劇照

主題曲好似《On Call 36小時》主題曲
過往4輯嘅《陀槍師姐》主題曲都係由天后鄭秀文所唱,今次《陀槍師姐2021》嘅主題曲《我不想别離》就搵嚟王灝兒JW主唱,唔少網民聽完之後都覺得同容祖兒所唱嘅《On Call 36小時》主題曲《連續劇》好相似,仲留言話:「首歌明抄連續劇」、「有同感 後段明明個度好似」及「有d似on call 36」等等。唔知大家又覺得呢兩首歌似唔似呢?

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!