【陀槍師姐2021】歐陽震華8年前急性肺炎入ICU險死 醫生話「你天濛光嗰陣走咗㗎啦」

《陀槍師姐2021》同前4輯《陀槍師姐》比較可以話係人面全非，雖然劇名以「師姐」掛帥，但係飾演槍械專家嘅「陳小生」歐陽震華絕對係劇集靈魂人物之一。近年Bobby減產少拍劇，對上一套做主角嘅已經係2017年《誇世代》，咁錫身係因為幾年前差啲出事「埋單」。

2013年農曆年間，歐陽震華因為急性肺炎入院，一度被送入深切治療部，當時有傳Bobby係飲酒過量酒精中毒入院，情況嚴重，佢太太傅潔嫻仲被傳媒影到憂心落淚，好在後來逃出鬼門關。上年年尾Bobby同好拍檔宣萱喺TVB《諸朋好友》節目憶述當時情況，嚇到宣萱眼都突埋！

事緣係當時歐陽震華拍緊《陀槍師姐》老拍檔關詠荷合演嘅《情逆三世緣》，劇組歲晚收爐，於是Bobby把握機會休息，年初二晚同朋友打邊爐密密食，之後飲咗少少酒就去「恰一恰」等其他人到場，點知吞錯格入咗肺搞到昏迷。Bobby話好在家人及時發現，見到佢塊面紫晒，立即送佢去醫院。

Bobby話送院後嘅急救過程當中自己仲有意識，但之後睇到「靈魂出竅」，後來醫生同佢講「你天濛光嗰陣時走咗㗎啦，但你8、9點又返嚟」，原來嗰陣血壓係咁跌，過一陣先再升返。醫生又話可能Bobby係演員捱慣眼瞓，一叫就醒，而Bobby醒返之後唔敢再闔埋眼，驚又再昏迷！

喺另一個訪問度，Bobby坦言更注重健康，而且要保持作品水準，唯一方法係減產，因為做得多而唔去「叉電」，好難做得好。

早前TVB節目巡禮披露咗Bobby會聯同一樣約滿走人嘅萬綺雯合拍新劇《伙記辦大事》，有望今年播出，隨時係Bobby嘅告別作。唔知被譽為「收視福將」嘅Bobby，呢套劇會唔會有好成績？

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！