《陀槍師姐2021》陳豪演技浮誇好趕客 睇到網民嗌頂唔順

無綫劇集《陀槍師姐2021》播放得如火如荼，對於劇情及演員班底評價就好壞差半，因為今輯風格同過去四輯好唔同，加入咗唔少輕鬆搞笑元素，再加上陀槍系列主角之一嘅陳三元（滕麗名飾）淪為配角，而劇情主要圍繞懸案小組阿頭蒙Sir（陳豪飾）同下屬Diana（宣萱飾）。劇中嘅蒙Sir同下屬關係麻麻、性格自大、心胸狹窄、愛計較、非常自戀 、經常中英夾雜兼以假音講嘢，配合埋浮誇嘅肢體動作，唔少網民都話頂唔順，紛紛留言話佢演技浮誇及趕客。

入行多年嘅陳豪，其實都唔係第一次用呢種方法去做戲，喺2006年陳豪喺《溏心風暴》中飾演「得得地」唐至安，當時佢已經不停用假音講嘢及講講下嘢走音，當時觀眾非常受落，佢仲憑角色榮升視帝。不過之後佢再用呢個方式去演繹《誇世代》及《殺手》角色時，唔少觀眾都話睇到都覺得煩。

今次唔少網民對於陳豪演技好唔受落，直插佢回晒塘、不斷退步、演技過於浮誇及演技十年如一日，而且仲要口齒不清添呀！不過亦有網民撐陳豪，認為佢做得唔錯、好好笑同鍾意呢個style嘅佢等等。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！