《降魔的2.0》易宇航表現搶鏡 拍劇出名嘅非華裔演員仲有佢哋！

喺睇劇嘅時候，大家間唔中都會見到非華裔嘅演員。佢哋有好多都係隻身嚟香港，就係為咗完成佢哋嘅演員夢，佢哋都係默默耕耘為劇集付出，以下呢班非華裔演員仲得到觀眾嘅認同，成功入屋。

易宇航

現年31歲嘅易宇航來自德國慕尼黑，屋企係一個醫學世家，喺慕尼黑經營一間耳鼻喉專科醫院。縱然家人已幫佢鋪好醫學路，不過佢覺得自己並唔適合，仲認為醫學生涯實在太嚴肅及沉悶。易宇航喺2006年嚟到香港後，喺香港大學完成學士課程，之後加入娛樂圈追夢。精通德語、英語、法語、普通話及廣東話五種語言嘅易宇航，入行至今參與唔少劇集拍攝，例如《愛•回家之開心速遞》、《福爾摩斯奶》、《解決師》及《機場特警》等等。近期熱播中嘅《降魔的2.0》都有易宇航嘅演出，佢喺劇中飾演大話魔王比利，同馬國明、林凱恩及胡鴻鈞等人有對手戲，戲份仲一啲都唔少，而佢嘅表現亦十分搶鏡。

陳振華

陳振華係香港出世長大嘅印度人，佢講得一口流利廣東話，不過就唔識得講印度話，仲要直至17年參與ViuTV真人騷《兩面不是人》先至第一次踏足印度。性格樂觀嘅陳振華，2007年經同鄉喬寶寶介紹下加入娛樂圈，多年嚟佢參與過唔少電影及劇集拍攝，最令人留下深刻印象嘅一定係《公公出宮》嘅別都醫生及《金宵大廈》嘅少數族裔警察Raj。大家都知道做綠葉演員嘅收入有限，所以平日佢都會做其他職業幫補生活。

河國榮

河國榮喺讀書時期有個嚟自香港嘅留學生同學，亦因為呢位同學而開始有機會認識香港粵語音樂，仲特別喜愛張國榮（哥哥）嘅歌曲。熱愛香港文化嘅河國榮，1987年嚟香港發展同定居，之後到一間私立學校任教英文，邊做邊學廣東話。喺一個機緣巧合嘅情況下，河國榮成為無綫嘅特約演員，隔咗無耐仲正式簽約為旗下合約藝員。多年嚟佢多次飾演警察高層、牧師、機師、紳士及律師等角色，仲試過喺劇集《龍兄鼠弟》、《苗翠花》、《FM701》、《富豪海灣非凡情緣》及《佛山贊師傅》演過5次Mr.Robinson。喺2000年，河國榮淡出電視圈。近年，佢重返電視界，仲喺唔同電視台節目現身，例如港台《有倉出租》及ViuTV《詭探》等等。

喬寶寶

喺香港土生土長嘅喬寶寶，未入娛樂圈之前係懲教署職員。喺2005年參加綜藝節目《殘酷一丁》，憑住邊搞笑邊唱廣東歌成功出位，仲試過將自己胸毛剃成TVB三個英文字母，令人留下深刻印象。之後，佢加入無綫成為藝員，拍過唔少劇集，例如《高朋滿座》、《古靈精探B》、《真相》、《完美叛侣》、《使徒行者2》及《黃金有罪》等等。喺2013年，太太申請香港護照被拒絕，於是重視家庭嘅佢決定舉家移民蘇格蘭。安頓好家人後，喬寶寶回歸香港，並且舉辦個人演唱會及與朋友一齊投資高檔路線水果店。計劃2020年退出娛樂圈嘅喬寶寶，喺上兩個月正式移居蘇格蘭同屋企人團聚，不過如果遇到好嘅劇本，佢話都會返香港客串。

布偉傑

美國出世嘅布偉傑，喺大學時主修中國文學及亞洲研究。1995年喺美國嚟香港做幼稚園老師及IT，之後經朋友介紹兼職做臨時演員，2001年首次參演無綫古裝劇集《騎呢大狀》拍攝，之後都有參演唔少劇集，例如《同事三分親》、《情逆三世缘》、《末代御醫》、《超時空男臣》及《福爾摩師奶》等等，不過大家最有印象嘅一定係《同事三分親》嘅「一哥」韋一。喺2018年約滿離巢後，佢嘅化妝師太太認識到荷里活嘅電影公司人員，上年已經接拍兩部電影，打算進軍荷里活發展。

陳明恩

陳明恩（Corinna）爸爸係新西蘭人，而媽媽係澳洲人，不過佢就係土生土長嘅香港人。喺2006年畢業於香港演藝學院後，加入無綫做藝員後，曾經參演過《絕代商驕》﹑《讀心神探》及《老表，你好嘢！》等劇集。除咗演得之外，其實佢都好唱得，因為佢當時喺演藝學院係主修音樂劇，自然有豐富嘅音樂底子，佢喺2013年參加《星夢傳奇》時更奪得季軍。另外，佢喺2017年與男友Eddy拉埋天窗，仲不時喺社交網站放閃。

郭栢榮

郭栢榮喺英國利物浦出世，自細對中國文化有濃厚興趣，仲試過喺唐人街超級市場工作，因為咁樣可以接觸更多中國文化及認識更多中國人。平日唔需要工作嘅時候，佢仲會花時間學習中文！透過中文 GCSE 的考試，2004年決定定居香港。2012年，有機會被資深製作人蔡和平嘅引薦下加入無綫，成為合約演員，之後佢參演過嘅劇集有《衝上雲霄II》、《華麗轉身》、《鬼同你OT》、《梟雄》、《天眼》及《福爾摩斯奶》等等。佢喺2016年完約後，與無綫改為兼職形式合作。