陳嘉寶分享點樣令姐姐自願留家抗疫 呼籲僱主要善待家傭

陳嘉寶（Anjaylia）與初戀男友黃頌祈（Epaphras）於2017年年尾拉埋天窗，婚後二人感情有增無減，今年一月誕下幼女Azaliah，成功三年抱三位千金。除咗忙於工作之外，Anjaylia亦努力照顧屋企人，不過一個人冇可能做到咁多嘢，好彩有老公同工人姐姐幫手。佢日前同網民喺IG大玩你問我答，期間有網民指曾經見到佢哋一家人對家中外傭好好，令到佢有感而發大談相處之道，呼籲其他僱主要善待家中外傭，更講出點樣令外傭會自願留家抗疫。

陳嘉寶與網民大玩你問我答時，有網民指曾經見到佢哋一家人對家中外傭好好，Anjaylia就話「工人姐姐對我哋屋企嚟講，就係屋企一份子，所以從細都教小朋友，姐姐有兩個屋企，一個喺菲律賓，一個就係我哋屋企，佢係屋企人，唔係淨係幫我哋做嘢嘅。」 。另外，佢仲分享同工人姐姐嘅對話，指從中得知有僱主不滿姐姐表現時會懲罰佢哋：「同姐姐前兩日食食下飯傾起，佢話原來好多僱主如果唔滿意姐姐嘅表現，係會扣佢哋食物，等佢哋食唔飽嚟做懲罰嘅...而且，不可思議地，呢種情況唔係一個半個個別例子，係好多！另外會動手嘅僱主亦大有人在。」

之後，陳嘉寶再強調要僱主將心比心話：「我想講，人哋都係人，離鄉別井嚟一個陌生地方都係為咗頭家。我哋只係僱主，唔係人哋主人！將心比心，你返工做錯嘢係唔係老細可以對你郁手郁腳？係咪可以倒咗你半盒飯要你餓住嚟做嘢？假設你識得有人咁樣對佢哋嘅姐姐，請勸阻！」

最後，香港疫情持續爆發，相信唔少僱主都擔心姐姐放假外出容易受到感染，所以佢就提出一個方法可以令到姐姐自願留喺屋企抗疫，佢話：「同時疫情期間，知道好多人都擔心姐姐放假出去會受感染，所以唔想佢哋出去。（所幸我哋姐姐都好癡家）當然好多姐姐係想抖氣同貪玩。但原來有更多姐姐決意要外出係因為就算放假留喺屋企都會無意中被叫去幫手做好多嘢。呢度幫少少，嗰度幫少少，就無咗日假...所以寧願落街坐公園食西北風都唔願意留喺屋企。如果大家真係想姐姐留家，就算屋企無一間房畀佢，都可以試下提自己千祈唔好畀佢幫手（有時佢哋唔好意思唔幫），同時禁止小朋友搵姐姐玩。」

現年32歲嘅陳嘉寶，當年以周秀娜師妹「八模兵團」出道，清純外表嘅佢因財務公司廣告走紅，有「邦民女」之稱。除此之外，Anjaylia仲有參與電影及劇集拍攝，當中憑《女人俱樂部》飾演年輕版李若彤「巫小詩」成功入屋，之後再為無綫拍攝《殭》及《誇世代》，反應亦非常不俗。近年佢減少幕前演出，今年憑ViuTV原創劇《IT狗》飾演「極品港女」KOL Shirley，入型入格，成功引起網民熱議及讚賞。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！