陳嘉賢神隱多年出山 《他來自江湖》老姑婆角色成經典 女兒1歲患血癌啟發創立支援病童團體

萬梓良、周星馳、吳孟達等人主演嘅TVB劇《他來自江湖》相當經典，劇中飾演辦公室老姑婆「人老珠」黃小姐嘅陳嘉賢即使係配角，但依然令人印象難忘。陳嘉賢90年代退出幕前，近年甚少現身，不過由前主播方健儀主理嘅youtube頻道《女人方言》就搵到陳嘉賢亮相受訪。

同周星馳、梁朝偉、吳鎮宇係TVB藝訓班同學嘅陳嘉賢，原來已經退出娛樂圈超過30年。陳嘉賢憶述考入藝訓班嘅過程相當輕鬆，由家姐幫佢填form交表，佢就從3000人中脫穎而出。不過陳嘉賢自言，入讀藝訓班前本來好抗拒煙民，入行後居然覺得「演戲時揸支煙好有型」，而且接受到身邊唔少人都食煙，令嘉賢驚覺娛圈係大染缸，一度想退學，好在得到老師劉芳剛鼓勵，並指「你未必會大紅，但綠葉一定做到」。

同學成為巨星，陳嘉賢喺訪問中承認當年未有把握發展機會，例如試過有監製搵佢第二日開工演出，但當時嘉賢仲有份正職，辭職唔做要補錢，於是推卻。後來陳嘉賢先發現原來嗰個演出係搵佢做女一，「細個囉，唔係好識掌握機會。如果你叫我評價（自己），我唔係一個好有野心嘅人，當打份工，真係懵得好緊要」。幸而而家陳嘉賢已經接受當時自己嘅決定。

方健儀多年前做記者時，採訪過由癌病兒童家長及醫生組成的「生命小戰士會」，陳嘉賢係該會創會成員之一。方健儀當時覺得有位家長好熟口面好sharp醒而且說話清晰，估計係非一般家長。後來方健儀先知陳嘉賢女兒1歲確診血癌，所以加入病人組識，希望幫助更多同路人。

陳嘉賢女兒後來接受化療後痊癒，而家已經26歲並在廣告行業發展，但係好景不常，輪到陳嘉賢喺一次健康檢查中確診一期乳癌，不過經手術治療後亦受控制。因為處理家長組織時面對其他小朋友離世嘅傷痛，陳嘉賢修讀神學院嘅哀傷輔導課程，後來繼續進修，而家已經成為傳道人。陳嘉賢話回顧人生，只要從中反省學到的東西，那些經歷將成為下一段人生的寶貴資源。「接納自己」是第一步、「反省悔改提升自己」是第二部，就能去到第三步「享受今天，活在當下」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！