陳奕迅演唱會公開售票網路大塞車 開售一個鐘唔夠一成飛賣出

陳奕迅演唱會公開售票 網路大塞車入都入唔到
陳奕迅演唱會公開售票 網路大塞車入都入唔到

陳奕迅12月喺紅館舉行嘅首次跨年演唱會Fear and Dreams ,門票今日朝早10點起公開發售。雖然呢次個唱冇優先訂票,而且有超過5成門票留作公售,但係唔少網民都投訴,售票網網頁同app一早已經大塞車。莫講話買飛,連load都load唔到。小編今朝9點幾開始試下登錄網站,結果個幾鐘頭都入唔到!

到11點左右,終於見到入去買飛嘅網頁,資料顯示5萬8千張飛當中,只係賣出4千幾張,佔整體一成都唔夠!明顯係因為處理唔切而影響銷情。

陳奕迅演唱會公開售票網路大塞車 開售一個鐘唔夠一成飛賣出
陳奕迅演唱會公開售票網路大塞車 開售一個鐘唔夠一成飛賣出

售票網塞車都唔係第一次發生,今年5月MIRROR紅館演唱會公開售票,好多鏡粉都係入唔到個系統,就算有幸撞入都唔代表買到飛,結果12場演出合共3萬7千幾張,用咗12個鐘頭先賣晒。

本來Eason今次嘅演唱會喺2019年舉行,但基於當時社會氣氛而取消,加上後來新冠疫情爆發,更加開show無期。而之前Eason捲入「新疆棉」事件,亦令唔少樂迷揚言唔買飛。呢次演唱會暫定開18場,俾公眾買嘅門票數量多咗,而且同內地口岸未完全開通,少咗內地Eason歌迷爭埋一份,起初唔少人以為買飛難度會冇以前咁高,點知都係要搶!

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!