陳家樂拍《逆緣》醉住試鏡成功改變一生 自爆裝嘔吐物膠袋放背囊 因呢個動作被珍姐相中

由陳家樂、火火、梁釗峰同KB主持嘅網上節目《巴打圍爐》，最新一集談及「改變一生嘅事」。因為拍TVB劇集《逆緣》而成功「入屋」嘅陳家樂，自爆當年為該劇試鏡係改變佢一生嘅事，但原來過程相當有趣。

家樂提到，為《逆緣》試鏡前一晚係香港電影金像獎頒獎禮，當年佢有份主演嘅電影《幸運是我》，女主角惠英紅獲得影后殊榮。頒獎禮後眾人去慶功，小紅姐提早離開，家樂為免掃慶就留低同大夥兒繼續飲。自稱酒量差嘅陳家樂提到，當日早上8點要去到TVB同監製王心慰（Amy)試鏡，但係佢嗰朝俾人灌酒灌到朝早6點半。家樂自言當時狀態「直情成個人斜晒……飲完返屋企沖個涼換件衫就出去」，上到的士仲拎住個膠袋係咁嘔，去到TVB門口仲嘔緊。更爆嘅係，家樂當時搵唔到垃圾桶，於是將裝住嘔吐物嘅膠袋放入背囊，聽到其他主持嘩聲四起。

到試鏡嗰陣，陳家樂話個人仲係斜嘅，但又要扮精神扮有準備，唯有碌大雙眼望住Amy姐，聽對方講劇情故事。形容係「捱完」嘅家樂轉個頭去咗廁所再嘔過，而且係用返之前放喺背囊嘅同一個嘔吐袋，「因為我冇ready多一個袋！」。嘔完之後，王心慰安排家樂去見另一高層珍姐（曾勵珍）！

陳家樂憶述王心慰同曾勵珍坐佢對面，已經十分辛苦仲要迫自己唔好坐到斜晒，於是坐到直一直紮馬咁款。後來曾勵珍同佢講咗一番畢生難忘嘅說話。「珍姐唔望我，淨係同Amy姐兩個喺度傾偈，跟住佢（珍姐）突然間話『你唔好以為我唔望你呀！我眼尾觀察緊你，睇吓你係一個乜嘢嘅人。』跟住佢話『好彩你都幾肯聽我講嘢，同埋你坐得好端正。』」，在旁嘅Amy姐亦都認同陳家樂適合，因為覺得佢咁樣坐好啱嗰個角色，以前啲人真係咁樣。」就係咁，陳家樂被相中演出《逆緣》。劇中家樂飾演生活於三四十年代嘅爺爺，因為抗戰時被日軍冷凍而穿越時空去到現代，難怪坐得直會有著數！

《逆緣》宣傳時，王心慰曾經透露選用「外援」陳家樂係因為佢個樣夠正氣，適合演抗戰游擊隊成員。劇集2018年推出後，陳家樂嘅表現令觀眾眼前一亮，自此人氣上升。之後家樂不時為TVB拍節目，更因同連詩雅合作主持旅遊節目《12個夏天》而結緣，後來陳家樂同連詩雅拍拖結婚仲有埋囡囡，難怪嗰次試鏡真係改變一生。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！