陳展鵬真心愛單文柔 唔會玩三角戀

·2 分鐘文章
陳展鵬拍劇又唱歌,有排忙!
陳展鵬拍劇又唱歌,有排忙!

視帝陳展鵬在新劇大玩三角戀,但現實中就不會發生在自己身上,直言只有對住老婆單文柔是真心!他又坦言終於真正覺得成為爸爸,因為多了很多互動,囡囡現時做到很簡單的事,都已經錫到囡囡燶晒,又謂想追很多個B!

陳展鵬相隔3年推出新劇《逆天奇案》,飾演O記高級督察,除了查案及有很多動作戲外,與林夏薇及馮盈盈更發展三角戀,笑言只有拍戲才有這些艷福,對老婆單文柔大派定心丸:「我喺出面都係假,係返到去對住佢先真。(所以佢好放心你?)都放心,同埋大家都尊重個職業。」他透露與盈盈首次合作,互相交流,自己都學到很多:「例如我會同佢講啲人話佢講嘢係機械人冇感覺,好多懶音,佢就話啲人覺得我好cool,我哋要聽外界嘅意見,大家研究吓。」又大讚盈盈記性好:「變咗好似我唔熟讀劇本咁,我同佢講戲,佢就會話『前輩不如你讀咗啲對白先』,佢畀到壓力我,我又畀到壓力佢。」

想生好多個

講到工作忙碌,一直冇停過拍劇,今年更重拾歌手身份出歌,問到何時有時間再造人?展鵬坦言:「我以前唔信啲人講嘢,話生完好想生多個,因為我覺得一個都搞唔掂,但依家經歷咗好多嘢,囡囡小豬比2歲,真係畀以前啲人講中晒,我好想生好多個!」但他坦言亦有其他因素需要考慮:「其實想生2、3個,但要計數,希望適當嘅嘢可以畀到佢哋,所以之後先再考慮。」

父愛大發的他愈講愈冧:「依家做爸爸感覺愈嚟愈強烈,之前唔覺自己做咗爸爸,但依家多咗好多互動,真係前世情人,佢做咗好小嘅嘢,可能只係識攞個匙羹餵自己食飯,我已經話好勁呀,想買咩就買咩。」又指老婆很寵囡囡,但明白不可過分溺愛:「所以我哋要有共識,依家邊個教緊,另一個就唔好出聲,如果唔係就會累到小朋友,縱就會出事。」