陳展鵬闊別2年兄弟內訌 挾台慶劇爭視帝 馬國明阻譚俊彥開齋

馬國明曾憑《白色強人》稱帝,今次再演醫生,未知能否再下一城!
馬國明曾憑《白色強人》稱帝,今次再演醫生,未知能否再下一城!

兩大台慶劇主角馬國明譚俊彥,被睇高一線成為今屆視帝,勁敵還有暫時是今年最高收視劇集《逆天奇案》的主角陳展鵬。已屬「視帝級」的馬國明與展鵬坦言隨緣,最緊要觀眾喜歡作品,而譚俊彥則希望有「零的突破」!

無綫兩大台慶劇將於10月18日同時首播,包括由「雙視帝」馬國明、鄭嘉穎及久未拍劇的鍾嘉欣擔演的《星空下的仁醫》,以及譚俊彥拍住首度做「女一」的鄧佩儀孭飛的《換命真相》。《星》劇除了有大量手術戲外,更有不少賺人熱淚的場口,主角嘉穎、何依婷與出名喊到觀眾「虐心」的鍾嘉欣都放「催淚彈」,而多次演醫生兼甚有說服力的馬國明再度演仁醫,令觀眾相當期待。至於《換》劇大玩穿越,要觀眾細味劇情,此類「燒腦」劇向來贏口碑輸收視,未知今次能否打破宿命,為從未稱帝的譚俊彥帶來「零的突破」!

「等我型番次」

忙於拍攝新劇《隱形戰隊》的馬國明受訪,透露《星》劇正安排拍宣傳片,問有否信心繼《萬千星輝頒獎典禮2019》再奪視帝?他一如以往笑說:「呢啲隨緣啦!不過大家都好期待呢套劇播出,希望觀眾喜歡。」有指他將與林夏薇開拍劉家豪監製的新劇《法言人》,他表示未正式接到通知:「《隱》劇拍到12月,所以都係等通知。依家都拍得幾辛苦,因為好多開槍同打鬥戲,都好玩嘅,好耐未試過開真槍,但拍呢啲戲真係好攰。我以前好少做警察,希望拍出嚟有型啲,等我型番次!」

唔夠瞓好辛苦

《換》劇是譚俊彥首套擔正的台慶劇,他受訪時坦言很開心:「拍呢套劇都幾辛苦,因為當時啱啱係疫情最犀利。劇本好吸引我,因為我未接觸過穿越劇,同埋拍攝期間知道另一套劇《拳王》要瘦身,我一路拍一路跑步做Gym,冇乜得瞓!(驚觀眾睇唔明?)套劇有好多唔同嘅時間線,所以配咗好多旁白,希望觀眾明白成個古仔發展,都有溫情同搞笑位,最難得係我會唱埋插曲,我等咗15年,終於等到自己第一首歌!」問有否信心爭奪視帝寶座,他說:「隨緣啦!希望觀眾睇到我哋嘅努力,因為真係好辛苦,仲有大量打鬥場面。」

至於展鵬受訪時表示,已2年沒有出席台慶頒獎禮:「今次如果同兄弟馬國明、嘉穎一齊玩都好開心,因為大家一齊成長。(有冇信心?)由觀眾去揀,嚟緊仲有幾套劇出,要睇觀眾口味。」

譚俊彥憑「燒腦」劇《換命真相》搶分,希望觀眾喜歡。
譚俊彥憑「燒腦」劇《換命真相》搶分,希望觀眾喜歡。
陳展鵬相隔兩年再戰台慶頒獎禮。
陳展鵬相隔兩年再戰台慶頒獎禮。