陳山聰冇膽着丁字褲 陳自瑤水着谷收視

東方日報
·1 分鐘文章
陳山聰與姚子羚互窒搞氣氛。
陳山聰與姚子羚互窒搞氣氛。

陳山聰、姚子羚、陳自瑤(YoYo)與劉穎鏇等,昨日為無綫熱播劇《大步走》宣傳。子羚表示若劇集有30點收視,YoYo會着三點式跑步,山聰即叫子羚着羽絨凸顯反差,女方不甘示弱叫他着丁字褲跑步,但山聰拒絕:「我係爸爸要檢點啲,做個仔嘅好榜樣,如果唔係佢第日返學好陰功o架!畀人話『你睇吓你爸爸,咁勁!』」至於YoYo說:「係山聰上次話我宣傳着得好密實,仲成日叫我着三點式!三點式唔係求其着,所以我話有30點先,點知佢就幫我大肆宣傳!」

姚子羚預告生B?

另外,日前本報率先爆李施嬅的未婚夫是星級教練Anson Cha(車崇健),好姊妹子羚表示之前曾見過男方,更跟過他操練:「佢好勁!(佢哋幾時結婚?)相信要等疫情過咗先可以搞。(爭你喎!)仲有胡定欣!其實邊個拍拖、結婚先都冇所謂,可能我快過佢生B呢!最緊要大家得到幸福,聽聞定欣搬屋係催旺桃花。(真係?)我都係睇報道講咋!」

陳自瑤(右)與劉穎鏇希望劇集收視節節上升。
陳自瑤(右)與劉穎鏇希望劇集收視節節上升。