雅虎香港新聞 陳庭欣踢爆翟威廉大把女
藝人陳庭欣（Toby）與翟威廉近日被拍到密會而再傳緋聞，昨日他們現身活動時解釋當日是應羅浩銘之邀食飯，而Toby男友亦知情。對於緋聞傳足10年，他們坦言沒所謂，會欣然接受。
無綫昨日舉行長期服務暨傑出員工榮譽大獎頒獎典禮，因疫情關係，有別以往在酒店進行，今次移師錄影廠，台前幕後逾200人獲獎。過氣緋聞男女翟威廉與Toby同獲10年服務獎，講到近日被拍到深夜密會，兩人表現輕鬆，翟威廉解釋：「因為羅浩銘喺台慶贏咗5萬蚊，照慣例要請我哋食飯，佢當日精心挑選咗3個人，但因為禁聚令，食完飯間餐廳好早收，所以就去咗我間酒舖。」他們又開玩笑指可能是羅浩銘故意放料。
對於緋聞傳足10年，有人提議翟威廉早日找個女友以杜絕跟Toby的緋聞？他坦言目前以工作為主，又自認要求高，女友最好懂唱歌及品酒。問到Toby會否幫忙介紹？她即笑說：「佢大把，佢識得人仲多過我。」又表示男友早知她當日約了翟威廉等外出用膳。
陳豪領20年服務獎
另外，陳豪與陳百祥同獲頒20年服務獎，陳豪笑說：「我乳臭未乾到依家乜都乾晒，生埋仔做埋老竇，人生算係咁！（有冇信心做到30年？）睇際遇，我啲細路仲細，仲有排捱。」而陳百祥則對「20年」有質疑，自言分別在1970、1978及1994年簽約無綫，笑言怎樣計也不是20年。
至於韓馬利已服務無綫40載，笑言不會再有下一個40年：「我應該冇咁長命，就算有，公司應該唔會要我，不過服務到50年都仲有機會，最緊要係健康。」她坦言喜歡工作，自從去年一場大病，更體會到健康可貴。
