【陳振聰明年出獄爆料】一早有劇集影射龔如心 女主角居然係李彩華

·2 分鐘文章

今日有報導指,因為偽造及使用虛假已故華懋集團主席龔如心2006年遺囑罪名成立嘅商人陳振聰,預計最快喺明年7月出獄。據知陳振聰有意出書,紀錄佢同龔如心交往過程點滴。

由龔如心丈夫王德輝被綁架、龔如心以小甜甜造型示人,到後來陳振聰自稱係華懋繼承人,通通都成為當時大眾茶餘飯後話題,出名反應快嘅香港娛樂圈中人,一早就想將呢個話題借題發揮。

2008年亞視重頭劇《火蝴蝶》,題材以富家女一生起落為藍本,女主角係李彩華。佢飾演嘅霍心儀出身名門,但係一場股災令家道中落,於是加入娛樂圈,因此結識富家子弟章學儒(唐文龍飾),並嫁入豪門。章家老爺(曾江飾)當年間接令霍父(盧海鵬飾)自尋短見,霍心儀為報仇施計奪取章家嘅企業,章學儒被綁架音訊全無,於是再掀起爭產風波。

唐文龍嘅角色被綁架並且失蹤嘅情節,同王德輝嘅遭遇雷同,但係當年《火蝴蝶》嘅監製楊紹鴻就強調故事只係一個女人成長故事,唔覺得同新聞相似。

《火蝴蝶》班底唔弱,上面介紹過嘅4位演員起碼有知名度,曾江同鵬哥嘅演技毋庸置疑,另外又有鮑起靜、江美儀、姜皓文呢班亞視之寶,加埋綽頭十足嘅橋段,結果喺弱勢嘅亞視度播,收視最高唔過5點。

亞視以外,無線2008年重頭劇《珠光寶氣》拍攝期間遇著陳振聰爭產熱話,於是安排劇中繼承丈夫一大筆遺產又無兒無女嘅女富商(陳秀珠飾演),將身家交俾得力助手黃宗澤,算係食到吓個話題。

【相關搜尋】王德輝綁架案

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能