陳敏兒讚智叔「專業」:佢係A+病人

陳敏兒昨午到醫院探望,表示智叔情況不錯,只是有點攰。
陳敏兒昨午到醫院探望,表示智叔情況不錯,只是有點攰。

兩奪金像獎最佳男配角的廖啟智(智叔)不幸患上胃癌,昨日智叔太太陳敏兒到醫院探病,親證丈夫去年12月因進食後胃脹不適,檢查後確診胃癌,她透露智叔抱輕鬆樂觀態度對抗病魔,獲醫生讚是A+病人。儘管智叔因不適食不下嚥,仍遵照醫生叮囑堅持食足三餐,令陳敏兒也要寫個服字。

現年66歲的廖啟智患上胃癌,現時全面停工,入住沙田的醫院私家病房接受治療。昨日1時許,陳敏兒到達醫院,並大方受訪,透露去年疫情關係智叔工作減少,一直跑步健身,體能和健康都十分好:「直到上年12月中,佢開始覺得食嘢個胃脹住,去檢查後就確診胃癌!」敏兒表示感恩遇上好醫生,跟智叔好夾,每日醫生都為他加油打氣,她說:「醫生大讚佢係A+病人,醫生叫做乜,佢都全力配合。不過佢個胃唔舒服,所以食唔到嘢,醫生就話唔食唔得,依家打緊仗要多營養,所以佢一日三餐都好努力完成。」

白粥變竹絲雞鮑魚

陳敏兒指智叔做演員好專業,想不到做病人也一樣專業:「記得有一日食粥時,佢話食緊竹絲雞鮑魚粥,冇得頂,我奇怪醫院有啲咁好嘢食,但其實佢食緊白粥,識得用輕鬆方法去度過困難,心底好佩服佢。」她透露智叔這兩天比較攰,因忙於照顧朋友的慰問,她引用智叔的說法:「多謝大家關心,但太多關心同問候對我同家屬嚟講可能係負擔,我已收到大家關心,如果大家愛錫智叔,就希望大家遙送祝福就得!」

她說醫生都建議病人不要接電話,應專心養病,問到智叔接受甚麼治療?她說:「醫生有好多方法。(智叔樂觀?)佢好積極。希望大家合作,多謝各位手足,我要入去喇,佢掛住我,佢需要我支持。」約一小時後她離開病房,問到智叔病情屬第幾期?她不願多講,並再呼籲各界不必再致電給智叔。她指兒子要上班,需配合醫院的探病時間才能探望父親。

周潤發祝早日康復

而跟智叔友好的藝人,均聽陳敏兒話遙距送祝福,周潤發說:「祝智叔早日康復。」而譚玉瑛亦說:「他在公在私都是一個頂級值得學習嘅師兄、好人,一定會好番,還會好得好快,我有信心喔!」而艾威幾日前已獲知對方入院:「他希望低調處理,既然他想低調,我也不便多談,請見諒!希望他吉人天相,早日康復出院。」

廖啟智
廖啟智