雅虎香港新聞 陳日君：好耐無同梵蒂岡來往 林鄭比梁振英更危險
港府修訂《逃犯條例》引起國際關注，獲梵蒂岡任命為天主教香港教區宗座署理的湯漢樞機，日前向全港堂區發出指示，表示修訂《逃犯條例》已引起市民恐慌，社會正受到修例所引發的極大憂慮所撕裂。他呼籲教友祈禱，希望政府能為市民的真正福祉，謀求合乎公義及誠信的解決辦法；政府人員以謙卑和虛心聆聽的態度，實事求是，保障市民的安全及自由。
天主教香港教區榮休主教陳日君樞機接受眾新聞訪問，被問到梵蒂岡對修例可有意見時說：「唔好意思講，我同梵蒂岡都好耐冇來往，我一路寫過好多信比教宗方濟各（講中國情況），都冇回信。我甚至驚我啲信去唔到佢手裏面，我曾專登坐飛機去嗰度，將信交畀佢，舊年去咗兩次，佢都冇回信俾我。去年１月，教宗有俾咗我半個鐘頭傾偈，信入面嘅問題冇答覆。我同教廷而家都冇乜溝通。」
梵蒂岡去年與中國達成主教任命臨時協議，陳日君大力發聲反對，曾在《紐約時報》撰文，質疑方濟各不了解中共，指方濟各來自阿根廷南美出身的背景，或對共產黨人有種自然好感。
陳日君受訪時透露，退休教宗本篤十六世在任期間，成立了「中國教會事務委員會」，但這個委員會在方濟各任內失蹤，「都唔係好好地取消，無聲地就冇咗。講得難聽，就係好強橫的做法。」陳日君指，該委員會主要關心中國教會事務，有30多人，包括梵蒂岡官員、專家、香港澳門台灣的主教，每年召開3天周年大會。
陳日君2017年的文章提及，該委員會對中國地上及地下教會的看法：「暫時還要接受地上、地下，但要記得我們都是兄弟姊妹，不要彼此為難、批評，大家要互相體諒，增加溝通，這是十分重要的。教宗本篤的信裡講了很多關於修和。合一和修和兩件事要分清楚。不可能立刻合一，但又不等於什麼也不做。大家應該開始修和，忘記以前的矛盾，知道大家都有困難，彼此要諒解。」
陳日君感嘆：「但現在他們很明顯不想聽我哋說話，於是取消了。本來2014年春天開會，完全冇咗消息。呢個委員會本來好秘密，但係大家都知有。我哋覺得委員會好緊要，因為有機會令到教廷官員同埋前線專家彼此溝通。但好明顯教廷官員，唔係好鍾意有咁樣嘅委員會，覺得佢哋搞掂就得啦，唔係好想我哋咁多意見。」
陳日君被問到特首林鄭月娥這位天主教徒任內的表現時說：「真係諗唔到佢做到咁樣。當然你可以想像，邊個肯做呢份嘢，都要聽話。但真係唔知佢聽話聽到咁樣。今次修例，有人話唔係大陸先提出要求，如果係咁，佢做咩做到咁絕？佢聰明人嚟，應該知道呢樣嘢好危險，佢真係想破壞香港咩、佢希望啲商人走晒咩、希望啲外國人唔嚟投資咩，真係好愚蠢。」
回歸後四任特首中，林鄭月娥和曾蔭權是天主教徒，被問到與林鄭的關係時，陳日君說：「我從來同佢冇關係。」
「佢同梁振英比較，佢聰明得多啦，所以更加危險，我覺得。」
林鄭可是虔誠教徒？ 「我點知佢呀。」林鄭作為教友，陳日君可有忠告給她？「我唔知佢諗啲乜嘢，好難明白。我從來都冇同佢有咩來往。曾蔭權做特首時，我都仲係主教身份，同佢有啲接觸，同林鄭就冇乜接觸。」
「曾蔭權做特首時，我都冇講咩好話，我做主教唔方便同佢傾。人哋話佢係虔誠信徒，我話虔誠信徒未必係好特首。」陳日君未有評價曾蔭權任內表現。被問到為何曾蔭權在獄中時去探望，陳日君說：「佢係虔誠嘅教徒，我哋都多機會見面，但唔係講啲好深入嘅嘢。佢好平安，咁好好，佢出嚟之前我都幫佢開彌撒，完全係神父同教友嘅關係。」
陳日君曾到獄中探望「佔中二子」戴耀廷、陳健民，「佢哋好平安。陳健民話入去準備睇書，話好忙，好多人同佢傾偈。」
「我好佩服發起佔中的三位，他們策劃的佔中是很理性的，實際發生的佔中唔係佢哋嘅責任。我又唔好意思話，其實呢個係學生嘅責任，佢哋心急，唔俾三子10月1號開始佔中，搶先一步。佢哋冇計劃呢套嘢，所以法庭咁判唔公道。」
「我的個人感觸係三位都是虔誠信徒。起初佢哋都想同啲學生商量吓，但學生唔理，有一次應承嚟都遲到。三位都想等，可以傾吓，真係好謙虛好忍耐。當時有啲學生話佢哋騎劫行動，但其實係學生騎劫佢哋嘅行動。我同三子傾到收尾，佢哋話，主教一齊祈禱啦，我都諗唔到，佢哋喺啲咁緊張嘅時刻，都記得要祈禱。」
觀看原文： 按此連結
