陳曉華動刀醫頑症 激光縮鼻膜

陳曉華長期受鼻敏感困擾,影響工作表現。
陳曉華長期受鼻敏感困擾,影響工作表現。

藝人陳曉華長年受嚴重鼻敏感困擾,趁半年休息期做手術改善情況,又連報兩個演技課程,望洗走「戲屎」污名。感情方面,雖然桃花旺盛被指連𠝹兩仔,但她現階段寧做「單身狗」,亦不願面對分手的結局。

挾港姐冠軍名銜入行的陳曉華(Hera),入行2年多拍了4部作品,不過處女劇《迷網》被嘲「戲屎」,加上鼻音重及黐脷筋等負評,令她不勝壓力。自知有不足之處的她,早前完成新劇拍攝後就的起心肝報讀演技課程,望一雪前恥!

自嘲戲屎 上堂惡補

Hera自小就有鼻敏感,說話時帶重鼻音,她透露趁這個假期做手術:「屬於小手術,因為個鼻入面腫咗,好似石頭咁,令我好易流鼻水,同埋啲污糟嘢排唔到出嚟,所以就利用激光射頻收細鼻膜,希望可以改善到鼻音問題。做完第一下感覺係好塞,本身冬天都成日係咁,喺錄影廠入面就更嚴重,密封嘅地方同狀態唔好都辛苦,真係好影響開工。記得拍第1套劇時仲因為鼻敏感發燒添,到第2套要食維他命先好啲。(做完手術有冇改善?)有嘅,不過未根治得晒!」鼻音問題加上演技有待改善,她亦忍不住「自踩」:「我自己都覺得戲屎!(上堂有冇進步?)未實踐到,但相信係有差別嘅,希望之後再拍劇時,大家會睇到我嘅唔同啦!」

怕分手寧願單身

談到事業似乎不及感情生活精彩,早前被指暗撻男子組合成員陳卓賢,又傳與狄以達舊情復熾,她大表無奈:「知大家會留意呢樣嘢,但希望留意番我工作。同陳卓賢唔係拍拖,係朋友,冇諗過買車會搞到咁,狄以達亦係朋友。(分手亦是朋友?)係呀!好難得。依家都恨拍拖,但呢個環境唔應該拍住,拍咗就會分手,雖然拍拖我好投入,但拍劇好忙就會分手呢!惟有唔諗,唔好有對象,可以更加專注事業。」

雖然恨拍拖,但陳曉華更想專心拚事業。
雖然恨拍拖,但陳曉華更想專心拚事業。