陳柏宇燒百萬「老本」:乞食咁滯!

東方日報
·3 分鐘文章
陳柏宇久未演出公開音樂會,唱得落力。
陳柏宇久未演出公開音樂會,唱得落力。

新冠肺炎疫情肆虐多時,娛樂圈深受其害,歌手、藝人呆坐等飯開,身為一線歌手的陳柏宇亦難逃厄運,坦言8個月以來入不敷支,無奈墊出近百萬「老本」維生,難怪他自嘲要「乞食咁滯」,就連1蚊都唔放過!他再自爆在冇收入的情況之下,網購再遇騙子,簡直是在傷口上灑鹽!

曾與友人投資兩間火鍋店的陳柏宇(Jason),因受新冠肺炎影響,無奈一執笠、一頂手,最後損手離場,副業發展一落千丈,同時作為搶手「隱世歌王」的他,表示自疫情肆虐後,足足有7、8個月沒有工作零收入,這段「真空期」惟有慢慢搣「老本」,更慘爆說「乞食咁滯」︰「好彩之前有儲落錢,喺呢兩個月就多番啲有錢Job,又出新歌上電視宣傳,咁都冇咁慌!」問到平時使費好大?他自爆每月平均使費要6位數字,保守估計8個月就「燒錢」近百萬︰「又要交租、保險、飲食、電費、車,希望之後工作量會多啲,11月中再會出新歌。(有冇叫老婆符曉薇使少啲?)有講兩句嘅,但好難阻止,佢為工作要買衫都冇計。」

又中伏畀人呃

「餓」極一時,前晚終於「開齋」迎來疫後首個有觀眾的公開音樂會,有份參與演唱的Jason受訪時大感興奮,表示久未出席公開騷,當記者打趣笑言「贊助」他1蚊時,他即刻「𦧲飯應」︰「畀1蚊我都會要,哈哈!」即使收入大減,作為慈父、暖爸的他寧願慳自己,都要給愛女Abigail最好,決心忍手不再亂使錢,卻無奈再受騙︰「好想買高爾夫球。(又買?你上次畀人呃喎!)嗰次之後又再呃多次,哈哈!仲有電子產品,收入冇問題嗰陣買咩都豪爽啲。(出咗新電話買唔買?)梗係唔買!你送畀我就用,今次疫情經歷咁多,學識積穀防饑。」

兩父女撼崩牙

講到發現剛滿兩歲的Abi門牙崩了一角,Jason解釋:「有日佢爬地下嗰陣跣手,隻牙撼咗落個地下度。」問到可會心痛?他竟然說「冇乜」,還抵死笑話囡囡好型:「有打畀做醫生嘅朋友問,話冇乜問題,最怕係影響牙根,之後會換牙嘛,我自己都崩咗隻牙,細個爭咪唱K撼到。(之後睇實個女?)唔好畀佢做啲太離譜嘅危險動作,雖然父母內心深處都會有隨時出意外嘅諗法,但都要放手畀佢去試。」

要養老婆同囡囡,陳柏宇負擔唔輕!
要養老婆同囡囡,陳柏宇負擔唔輕!
符曉薇因工作需要而買衫,老公陳柏宇都體諒。
符曉薇因工作需要而買衫,老公陳柏宇都體諒。