陳海琪是非簿︳傳酒會飲大兩杯被保安夾走 跳槽新城激到商台「永不錄用」

革新嘅《勁歌》加入新環節，由一班「音樂選民」評價節目中演唱嘅歌手，第一批被當面「批鬥」嘅洪卓立同何雁詩，被資深DJ陳海琪狠批，何雁詩更加喊出嚟。陳海琪就話自己只係講真話，仲話而家好多人都接受唔到真話，令自己要冒風險。

做勻香港各間電台嘅陳海琪，向來都有唔少是非，佢就話自己只係對工作認真。

商台跳槽新城 焫著俞琤

陳海琪80年代參加商台DＪ招募入行，後來過檔港台主持節目《青春交響曲》、《夜傾情》及《海琪的天空》等成名，1993年重返商台做音樂總監。不過第2年就以讀書為由辭職。但係轉個頭，陳海琪就跳槽到新城做台長，激到商台揸fit人出通告話「永不錄用陳海琪」。陳海琪解釋離開商台只係想休息，點知辭職後新城就搵洋人高層帶埋合約到佢屋企樓下邀請過檔，海琪認為未做過台長所以接受。而佢做咗新城一年，就因為人事問題走人，再返港台，即係3年做齊3個台。

鬧聽眾cut線被問候

向來直率嘅陳海琪，做節目一樣咁直，主持節目電話環節時，成日會同聽眾鬧交、駁咀甚至cut人線，有聽眾唔客氣大氣中爆粗鬧佢。不過因此令陳海琪人氣上升，當選最受歡迎主持多年。

同鄭大班擘面 3個月破冰

陳海琪曾經喺「大班」鄭經翰旗下嘅數碼電台DBC及網台D100做主持，2013年陳海琪喺D100嘅節目《海琪的天空》突然停播，鄭大班喺自己節目表示「海琪與管理層之間有意見分歧」而需要「請她暫時休假」，大班又表示陳海琪可以隨時銷假。陳海琪就以長文回應，外界以為二人不和，點知3個月後陳海琪又返D100做節目，不過都係做一陣就走。

唱片店開幕酒會high爆 被保安帶走

2015年，唱片零售品牌HMV搵陳海琪出任高層，旗艦店開幕酒會上星光熠熠，鄭秀文同林子祥都有去撐場。當晚陳海琪作為主人家梗係滿場飛，但係有傳佢飲大兩杯，走上台上拎咪爆seed，最後被現場保安人員「夾走」。

事後陳海琪話冇飲醉酒，只係有人做謠生事，並且出post強調「三兩杯白酒對我毫無作用，有心人的計謀到達效果」。

插樂壇新晉「音樂無驚喜」

主持音樂節目多年，陳海琪幾年前一個訪問評價新一代歌手，認為佢地嘅「音樂無驚喜」，又話冇一個帶來震撼嘅表演者，而且唱歌只係當做份工，又感嘆有啲藝人以為身份只係一張卡片。佢仲以已故嘅羅文為例，提到「籮記」唱《壞情人》為咗一個完美的舞姿，喺後台轉圈轉到頭暈，十分用功。陳海琪又覺得2018年逝世嘅盧凱彤，係熱愛音樂、難得有靈魂嘅新一代歌手。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！