陳潔玲上《恐怖在線》自爆疑被人落降頭 細數無綫靈異事件

無綫前藝人陳潔玲（Christy），喺前晚接受由潘兆聰主持嘅網台節目《恐怖在線》邀請做嘉賓，期間佢大爆自己疑似被人落降頭及分享喺無綫發生嘅靈異事件。

陳潔玲喺節目開頭就講到上年曾經捲入感情糾紛，當時有一個已經有女朋友嘅男仔，但係佢就周圍追其他女仔。Christy嘅其中一個女仔朋友就同呢個男仔關係曖昧，但係呢個男仔仲去接近佢。當時Christy同朋友已經覺得呢個男仔嘅氣場好奇怪同埋性格好反覆，最後Christy同佢講清楚，亦冇同佢發生任何感情關係。隔咗無耐，正印就發現呢個男仔同Christy個女仔朋友嘅關係，同埋知道Christy曾經牽涉其中，之後正印就用唔同嘅方法對付及騷擾佢哋，當中包括發生一連串嘅怪事，包括時裝店試全新嘅裙俾針拮到大髀、家中電器無故開關及玻璃煲蓋飛落地下等等。

發生呢啲事之後，陳潔玲嘅相熟法科師傅就教佢多啲唸經之外，仲俾咗張觀音咭叫Christy貼喺睡房門，Christy嗰晚瞓覺就俾鬼責，無論佢點郁點嗌都冇用，喺佢半夢半醒嘅時候，佢就見到有人開佢屋企鐵閘行入屋，然後有三隻小鬼企喺房門口。之後，Christy就用最大嘅意志力去嗌出聲，最後先無事。

經過呢件事，陳潔玲Christy身邊嘅朋友都話佢撞鬼，有陰陽眼嘅朋友仲話有隻鬼黐住佢。另外，佢亦覺得自己成日都好負面，唔係好容易控制自己嘅情緒。而潘兆聰就即刻搵有靈力嘅人士幫Christy睇，最後證實佢身邊有鬼跟住。

另外，潘兆聰仲同陳潔玲傾發生喺無綫嘅靈異事件，Christy就話雖然佢唔係親眼見過，但係就有一個好深刻嘅經歷。話說有一日Christy就嚟開劇，佢嗰日係朝早要出外景拍攝。喺整理好頭髮及妝容之後，佢就要上外景車換衫。當時只有佢一位演員需要拍攝，但係負責幫佢梳頭同化妝嘅工作人員就話頭先有一個男仔跟咗佢入去換衫。