陳瀅唔領姊妹情拒「相睇」

·3 分鐘文章
單身的陳瀅暫時以工作為重,愛情則隨緣。
單身的陳瀅暫時以工作為重,愛情則隨緣。

陳瀅與馬德鐘在新劇上演一段成熟的戀人關係,現實中她亦希望找個成熟穩重的男友,因她渴望像好姊妹般組織家庭,更希望35歲前結婚!又坦言一眾姊妹都戥她心急,紛紛介紹男生給她,但她卻覺得太夾硬,故拒絕赴會!

「宅男女神」陳瀅在熱播劇《伙記辦大事》飾演物流公司太子女常笑,角色內心複雜,她坦言是入行以來最大挑戰的角色。劇中她拍住雙視帝歐陽震華及馬德鐘、萬綺雯等前輩合作,其中她與馬德鐘飾演情侶,更有水底親密戲,她特別難忘與對方的對手戲:「因為我係第1次演段咁成熟嘅關係,唔係卿卿我我嗰啲,而係大家都有少少隱瞞嘅關係,要經歷好多考驗、矛盾位,本身睇劇本時我驚自己演唔到個層次,但大結局我同佢嘅最後一場戲,拍完反而有滿足感,覺得好正,提醒咗我點解就算自己一個女仔喺香港咁辛苦,都仍然堅持繼續行!」

她又大讚與馬德鐘相處舒服,大家像朋友般溝通,亦難忘對方有次挺身幫她:「有一個禮拜我基本上冇瞓過覺,佢每日都會為我打氣,到最後一日拍完嗰場戲,我終於可以瞓覺,嗰日我返到去廠,佢見到我入嚟已經叫大家拍咗我先,畀我返去瞓覺,我覺得有人鼓勵我、企出嚟幫我講說話,好窩心。」

35歲前結婚

工作排山倒海,劇接劇未停過,反而愛情方面這幾年都是交白卷,雖然有方力申等緋聞男友,但陳瀅再次澄清只是朋友,現時單身的她將工作排首位,愛情隨緣。她坦言不恨拍拖亦不恨嫁,但渴望組織家庭,特別受身邊好姊妹如陳嘉寶、賴慰玲等影響:「見到佢哋個個都一Pair Pair好穩定,變咗家庭式嘅愛,係我好想有嘅嘢,以前我淨係想要個男朋友拍拖食飯,但依家唔淨係咁樣,想有家庭。」現年31歲的她希望35歲前結婚,笑言雖然現時十畫未有一撇,但不太擔心,相信定會遇到喜歡的人。她又笑言姊妹有介紹男仔給她:「但我通常都推,因為覺得好夾硬,好似相睇咁,好大壓力,我鍾意Casual啲。」講到擇偶條件,她表示已準備好有個家,故希望對方認真為主,是穩重、踏實、成熟、孝順的男生,年齡沒有限制,又笑言不一定要靚仔。

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能