雅虎香港新聞 陳詩欣分手即刪前度
被封為「一件頭女神」的陳詩欣擅長討論女性話題，更不介意在節目中分享自身戀愛經歷，自爆最愛為男友配上超長的肉麻骨痹稱呼，令家人都覺得她的舉動難頂。
《姊妹淘》節目除了美容潮流等話題，還有不同的範疇，「3日2夜」女神陳詩欣（Eunice）在節目中則負責「講是非」，她說：「例如女性話題，好似分享吓感情經歷。因為上一輯我爆咗好多嘢，例如貼心情人係點、最難堪嘅分手理由呢啲，加上佢哋覺得我chok人技巧好叻，所以覺得我一定要負責呢個位。」
父母都覺「肉酸」
Eunice承認好多分享都是自身經驗，但在鏡頭前就講成是朋友的經歷，最爆笑是被父母拆穿：「因為有啲嘢佢哋唔知，睇完節目就話知道咗我好多嘢。」她自爆男朋友的來電稱呼好肉麻：「可能人哋會覺得好惡心，連阿爸阿媽睇完，都會話『乜你以前咁肉酸(o架)』。（分手後都保留稱呼？）梗係唔會啦，我好小器(o架)，會即刻刪除佢，或者轉番正常名。」她坦言不主張情侶互睇手機：「因為check電話，就算人哋冇做錯，都會搵到啲令自己唔開心嘅嘢，呢啲係我經歷過後領悟到嘅，所以我唔畀人睇電話，亦唔會查男友電話。」
疫情中Eunice一直有工開，目前她主要在綜藝節目發展，除了娛樂新聞主播工作、主持《姊妹淘》，之前在慈善節目中更重拾歌手身份唱跳，她說：「好多人讚我都跳得吓，所以我最近練番唱歌同跳舞，希望多個技能傍身，自我增值充實自己。」
