雅虎香港新聞 
陳豪自爆曾是蒲精一名 零收入用十萬卡數填氹
大家心目中的筍盤，後來變成最佳老公、暖爸的陳豪，原來都有荒唐時，模特兒出身的陳豪，恃住自己生得高大有型靚仔又搵到錢，晚晚同班模特兒朋友喜愛夜蒲，真係估你唔到。
文：東方新地 | 圖：《Tiger’s Talk》截圖
夜場冇收穫 陳豪：講就無敵，做就無力
日前陳豪同黎耀祥接受由伍詠薇、林盛斌主持的邵氏兄弟出品之訪談節目《Tiger’s Talk》時，陳豪直認曾是蒲精一名，佢自爆拍攝電影《晚九朝五》的年代，一星期蒲足五晚，不過有一日突然醒覺，陳豪話：「當時感覺就好似一盞射燈照住你，突然醒覺咁樣好浪費時間，係時候為人生做返啲嘢，於是就180度轉變，自此之後冇再踏足夜場，好努力為人生拼搏。」伍詠薇追問係咪大把女埋身？陳豪笑笑口話：「諗係咁諗，但真實係永遠都空手而回，講就無敵，做就無力。我係唔會飲到爛醉嘅人，主要落去跳吓舞，自己溝唔到女咪睇人溝女。我相信每個人成長都需要花段時間去認識自己，後來先知其實自己根本唔鍾意呢啲生活，只係想陪朋友，嗰時啲朋友想去就陪埋一齊去。」
呃住父母一年冇工開
被喻為無綫金蛋的陳豪，演藝路看來相當順暢，當模特兒時收入豐厚，又做過電影主角，不過陳豪話都有兜茂時：「我雖然冇祥仔捱得咁耐，但當我有心做演員時，電影圈又唔太吃香，開始冇嘢撈，試過一年都冇工開，完全冇收入，唯有卡數冚卡數，差不多有成十萬卡數，但我唔會問屋企人拎錢。」後生時玩夠蒲過，先有今日愛家庭愛老婆的陳豪。
祥仔爆萬歲最闊綽係靚靚Dicky
伍詠薇稱自己拍檔過的演員中，以羅家良最闊綽，經常開工萬歲，而祥仔說：「有位女演員唔係成日拍，久唔久先返嚟拍劇，有一日外景放午飯，平時正路求其一間酒樓就算，點知佢就搵附近一間名牌酒樓，補幾千蚊出嚟食，完全冇詐型，冇睇價錢好豪爽，（咁大方梗係開佢名啦！）咪就係袁詠儀囉！當年張衞健喺清水灣電視城最興放低幾千蚊喺度，直接扣數唔使次次畀錢埋單，好有型！」
提到《殺手》入面，黎耀祥飾演殺手閻武一角，他直言在從影而來武打戲最多的一次，而且拳拳到肉，在台灣廟宇的一場戲更不慎傷腰，他說：「本身係想用威也，不過嗰度做唔到，我要踩上武師隻腳再起腳踢，點知佢頂唔住我隻手，兩個一齊跌落地，我墊底，我本身都驚一驚，尾龍骨一傷就好大鑊，好彩又起到身，於是繼續拍攝。」
延伸閱讀：
