陳鍵鋒驚現黃偉文IG原來二人老友鬼鬼 Wyman大爆對方秘密

44歲陳鍵鋒自2010年北上內地發展後，鮮有於香港露面，亦自從去年底拍完網絡電影《封神榜大破萬仙陣》之後暫時都未有任何新劇或綜藝節目，更甚少更新社交平台。日前無綫劇集《拆局專家》一班演員舉辦飯局，陳鍵鋒亦有出現，被指身形發脹；而黃偉文（Wyman）於周一（9日）分享與陳鍵鋒合照，大爆相識原因及公開陳鍵鋒嘅秘密，二人老友鬼鬼嘅關係令網民大感驚喜。

黃偉文表示大家未必知道佢與陳鍵鋒熟落，因為睇落好似大纜都扯唔埋，但其實二人早就認識：「早於好多年前（我估佢寜願我唔好講實數）喺電台已經認識。將Samuel變成『阿苗』都係我做嘅。」黃偉文又被問網民問到陳鍵鋒係咪唱得之人，即時大爆對方非常唱得；其實，陳鍵鋒曾簽約3間唱片公司，更試過飛去台灣出碟，可惜最後未能圓歌手夢。黃偉文更分享，陳鍵鋒呢次行程好多嘢棘吓棘吓：「本來為佢安排好平安夜同除夕Party，佢last minute都出席唔到（故仔等當事人自己決定share唔share），幸好都爭取到機會見咗幾次，都開心。」仲用上「S先生 連環不幸事件」形容陳鍵鋒。

從照片中看到，陳鍵鋒滿面通紅，好似飲咗唔少酒；有網民就留意其身形，指佢身形發脹，不過與當年一樣咁靚仔，又指陳鍵鋒與吳岱融撞樣。而陳鍵鋒近年暫停幕前演出，相信係基於早年發現腦部天生缺少一條血管，陳鍵鋒之後成為基督徒並修讀遙距神學學士課程打算傳教。具有獨木舟、聾人手語、幼兒護理、急救牌、潛水牌等技能等級證書嘅陳鍵鋒更加擔任潛水教練，不過2021年捲入一名男士西貢學潛水溺斃事件中，被指當時嘅教練就係陳鍵鋒，事後陳鍵鋒更搬離寓所。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！