隱形戰隊｜羅孝勇飾型格冷血殺手有驚喜 眼神及動作場面到位獲網民讚賞

由馬國明、陳山聰、唐詩詠及劉穎鏇主演嘅TVB劇集《隱形戰隊》正在熱播中，劇集除咗有唔少驚險槍戰場面及搞笑情節吸引觀眾之外，一班劇中演員同樣非常搶眼，深得觀眾及網民愛戴，當中包括喺第8集登場飾演型格冷血殺手陳環嘅羅孝勇（Sheldon）。

前晚（15日）羅孝勇喺升降機登場，著上男護士制服嘅佢意圖喺醫院運走受重傷嘅林醫生（林景程飾），佢同追入升降機嘅Ocean簡曜洋（馬國明飾）及Madam Q（唐詩詠飾）先用眼神對峙，其後發生激烈打鬥及槍戰，最終破窗逃離醫院。喺噚晚嗰集佢再次登場，喺殺人後被Ocean及Cool Sir（陳山聰）聯手制服，最終下半身癱瘓，及指證富商周昌盛（杜燕歌飾）罪行。

羅孝勇飾演型格冷血殺手陳環，無論眼神定係動作場面都非常到位及有型，除咗得到監製文偉鴻上載其截圖及留言大讚：「請大家記住呢位好演員 佢舉手投足都散發住一股野獸味道！Perfect cast!!! 超強殺手，陳環-羅孝勇」之外，唔少網民亦留言大讚佢表現出色，例如「羅孝勇表現不錯！有進步，請繼續努力！」、「做得幾好 羅孝勇加油」、「羅孝勇外形好。身手好。演技唔錯。欠缺機會」、「佢可以轉做武打演員拍電影接捧啦，其實幾型」及「個殺手勁好打，應該畀多啲機會羅孝勇」等等。

現年34歲嘅羅孝勇，喺澳州出世及長大，畢業於西澳大學經濟系，佢喺畢業後並冇從事相關工作，反而選擇回港參加TVB歌唱比賽《超級巨聲2》，獲得季軍後便加入TVB。佢除咗拍劇之外，同時亦有為明珠台節目做主持。去到2014年，羅孝勇正式簽約星娛樂，以唱作人身份進軍樂壇，推出首張個人EP及首支派台歌《Your Love》，不過可惜星運平平。未被力捧嘅佢選擇唔續約向外闖，2019年組成樂隊Harbor Homme推出英語歌曲《A Song for Her》。去到2020年，佢重返TVB，主要以拍劇為主，例如《飛虎之壯志英雄》及《法證先鋒V》等等，不過始終都係未能跑出。上年佢再度離巢並加盟邵氏成為旗下藝人，現時喺澳洲梅鐸大學進修脊醫學士學位課程，不時亦有回港拍劇。

至於感情方面，羅孝勇喺參加《超級巨聲2》時與林欣彤拍拖3年，2015年與模特兒出身，兼現時係影壇新貴嘅單親媽媽王丹妮拍拖，二人喺2020年結婚，至今依然甜蜜恩愛，不時喺社交網站放閃，及夫妻檔接job。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！