隱門｜63歲吳岱融動作場口親身上陣 角色比「鷲哥」更癲

TVB新劇《隱門》接棒《川內相親》於星期一至五晚上8時半播出，演員方面包括陳展鵬、黃智雯、湯洛雯、吳岱融、劉佩玥等。劇集講述30年前悍匪葉嘯天（吳岱融飾）於一宗械劫案被捕而入獄，當年曾為葉嘯天接贓嘅女兒改名換姓，以張心月（黃智雯飾）之名重新生活，並嫁予遊艇大王殷昊然（黃子恆飾）；面對剛出獄嘅葉嘯天，張心月無法再逃避呢個夢魘，婚姻關係亦出現危機。吳岱融過往於劇集《巨輪II》奸角「鷲哥」深入民心，今次飾演嘅葉嘯天狠毒程度更加升呢。

與吳岱融三度合作嘅監製王心慰表示，葉嘯天呢個角色係專誠為吳岱融打造，過往拍攝《巨輪II》時已經覺得吳岱融表現超出預期，有潛質再爆上去，而呢次佢就激讚吳岱融爆Seed程度達天花板境界。對比《巨輪II》「鷲哥」及《隱門》「葉嘯天」角色，吳岱融就覺得兩者大有分別，表示「鷲哥」係有錢嘅惡人，葉嘯天係冇錢嘅惡人，因為冇錢佢發晒癲，不擇手段，直言係從影以來最衰最變態最癲嘅一個角色。拍攝劇集時，雖然有替身stand by，但吳岱融大部份動作場口都選擇親身上陣，直言需要大量體力，幸好平日有踢波及一小時慢跑習慣。吳岱融亦表示拍呢套劇成日要將個轉數Tune到好高，又打得比較多所以有啲壓力，但見到囝囝喺現場為自己拍攝劇照，即刻感到好溫暖。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！