離婚律師教路!第一次約會你要問嘅9個問題

19+

聖誕新年party過後,好可能你識到啲有意思嘅人。

 

而呢個禮拜,好可能已經text緊,甚至即將單獨見面。

 

點先知呢個人係「對的人」?

梗係要搵最有經驗嘅人教路啦。

 

咩經驗?專搞離婚case嘅律師囉。

佢地先係最清楚,咩人咩性格最易離婚,比起自稱閱人無數嘅老友更加pro。

 

綜合多位離婚律師嘅意見,佢地認為初次約會,

問下呢9條問題,睇吓呢個人值唔值得長線發展。

 

1)你對上一次同屋企人傾偈係幾耐之前?

同屋企人冇兩句,可能性格出事,又或者唔識處理關係,甚至係家人有問題,好難拆;

太黐家咩?可能又未必會將屋企排喺你前面。

 

2)你信唔信有童話式愛情故事?

一段關係係要經營,happily ever after之後出字幕只係電影先有。

你想同個王子/公主病人一齊嗎?

 

3)你結咗婚未?

呢句真!「處理緊」、「冷靜期」即係仲未搞掂,

咁你處理完冷靜完先搵我啦。

 

4)你鍾意你份工啲咩?

了解吓佢對工作嘅態度,睇吓佢係hea底、工作狂、跳槽精定才俊。

第時佢嘅時間預唔預到俾你?佢點做嘢係一個啟示~

 

5)上次放假你飛咗去邊?

呢條係「側踢」對方財務狀況嘅好方法。

儲錢先飛到?儲miles換機票?喪買定係睇名勝?大概知道一個人點駛錢。

仲有,目的地嘅口味,都要夾嘅。

一個鍾意去東京買福袋,一個鍾意去西藏,點扯得埋?

 

6)你以前有冇睇飛輪海啲劇?

原文係建議問對方識唔識一個老牌影星。點解要咁做?

原來好多人到訂婚先知對方年紀!

佢唔肯講,咪由佢識得咩年代嘅歌星演員呢個位切入!

 

7)你識唔識同人溝通?

溝通有幾緊要?你話呢?

準確啲講,你覺得佢識唔識表達自己睇法?

因為好多夫婦都係收埋收埋,到出問題先發覺,冇得扳了。

 

8)上次分手係因為……?

如果佢話係對方有錯,即刻著紅燈!兩個人嘅事,一隻手掌拍唔響嘅。

 

即使係初相識,如果佢唔會為咗留下好印象,

肯將件事客觀地睇,講出自己有咩做得唔夠,

咁樣反而更有好感。

 

9)如果有得返轉頭,你想改變人生邊件事?

呢題,唔太突兀又可以套到料。

如果佢話「想追返當年個女神」,咁唔醒水?next!

 

原文傳送門

你可能還想看