難忘第一眼見到Karyssa 利嘉兒(下):肉赤都要放手俾佢跌跌踫踫!

蘋果動新聞

八年以來,經歷過高高低低種種磨難,利嘉兒今年中秋前剖腹產女,終於等到護士把女兒推進病房的這一刻:「講起第一面就真係好難忘,當時人剛剛醒、麻醉藥又未過,傷口痛緊、朦朦朧朧之間見到姑娘推住眼腫面腫顏色又紫嘅BB入嚟,老老實實,個心一沉,第一個感覺係:『吓?就係佢喇?』第二日個人清醒番,其實好內疚自己曾經咁諗,其實已經即刻愛上個女。姑娘仲同我講,個女一出世瞓住覺已經識笑,同我細個時一模一樣!」

兩個月後 終於上手磨合到
到了這個月中,Karyssa就滿三個月,三個月來,利嘉兒也成了曬女狂,IG清一色都是肥肥白白的Karyssa可愛肉照,也明白了產前修身、復工計劃一大堆,可是產後女兒大過天,出門工作幾個鐘已經難捨難離的感覺:「頭一個月唔知係唔產後荷爾蒙影響,個人心情起伏特別大,小小事都覺得係打擊。生前病到生後,餵唔到人奶,打亂咗計劃啦;我搞唔掂個女,陪月姨姨一抱上手就唔喊,係即刻停喎!嘩!個人超大挫敗感,驚無咗陪月自己搞唔掂、驚個女親人唔親自己、驚自己乜都唔識無樣做得好…….都係呢一個月嚟,同老公逐樣試逐樣學,每一次餵到奶、沖到涼,自信心番晒嚟,仲有time table呢、喊聲呢?由乜都搞唔掂唔知為乜喊,到慢慢可以跟到個時間表,一出聲我就知係肚餓扭抱定係要換片,個女一日一日咁大我哋一日一日學識做人父母,佢又多咗表情同我哋多咗互動,有時同佢玩一玩,乜辛苦都唔記得晒,覺得最美好最值得就係呢一刻。」

 

image1
image1
image2
image2
image3
image3

夫妻共識 切忌過度寵愛
每個父母都覺得自己的孩子獨一無二,自豪媽媽利嘉兒說,女兒一出世,醫院姑娘就稱讚Karyssa是個快樂寶寶,出世十天拍初生照,攝影師也誇Karyssa人仔細細已經識追鏡頭,眼仔碌碌好多嘢諗喎!「媽咪話我細個都係咁,一出世就識笑。Karyssa好得意,細細個望人已經由頭望到落腳,好似好老積、看透世事咁嘅樣。咁辛苦咁多波折等到佢出世,我同老公當然錫佢又赤佢,喊得大聲啲都肉痛,但係都好明白即使得佢一個,我哋都要教好佢,唔可以過份寵溺,要捨得放手,俾佢跌跌踫踫個人至會長大。做咗咁多年人,我諗有朝一日到佢明白,我會教曉佢,讀書要盡本份,但係做人成功,做事才會事半功倍。我希望佢長大會識尊重人又識尊重自己、懂愛人亦懂愛自己,要有禮貌、真誠待人、有正確道德觀念。同埋一定要有思想,要知道個世界發生咩事,始終懂同人相處懂融入群體,人才能夠融入世界!」

image4
image4
image5
image5

其他內容