雷宇揚與細21年內地老婆婚姻低調惹婚變傳聞 為囝囝修心養生 馬荔擁超猛背景

57歲雷宇揚（鬼王）自2012年與細21年嘅內地女主播馬荔結婚後定居於廣州，甚少出現於幕前及公開場合，兩夫婦與囝囝一家三口嘅生活亦相當低調。36歲馬荔近年開始活躍於社交平台，頻頻直播吸納一班粉絲，亦令夫妻生活再次受關注。

馬荔抖音帳號獲逾260萬人關注，以分享生活影片因為主；從影片所見，馬荔大多穿上貼身連身短裙，大騷豐滿上圍與長腿，加上一頭烏黑長髮，完全唔似一名人母。據知，雷宇揚與馬荔喺一次工作下認識；事緣馬荔係廣東經濟科教頻道王牌新聞節目《620南方財經報導》主播，同時又係廣東王牌民生新聞《今日一線》主持人，當年因為一個有關香港藝人嘅專題訪問而認識雷宇揚，繼而拍拖結婚。

雷宇揚與馬荔婚後甚少分享一家三口合照，亦因為呢份低調惹來分居及婚變傳聞，不過二人選擇保持沉默，一直未有就傳聞回應。而雷宇揚曾經接受訪問表示而家將囝囝放於首位，盡量減少飲酒等應酬活動，唔會好似單身時成日出去飲酒，以及會推太遠、需要出走好多日嘅工作，希望有多啲時間陪老婆馬荔及囝囝。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！