電影版《尋秦記》劇照宣傳片曝光 網民大呼期待！

一年一度嘅「香港影視娛樂博覽2021」喺今日揭幕，電影公司及電視台都嚟個大晒冷，當中最令人關注嘅一定係電影版《尋秦記》。20年前嘅無綫神劇《尋秦記》係唔少80和90後嘅集體回憶，咁多年來不停傳出翻拍消息，早前古天樂買咗電影版權，由天下一投資，仲邀請返原班人馬開拍電影版，令人相當期待。由於拍攝過程一直相當保密，角色造型亦從未公開，直至今日首條宣傳片和劇照終於正式曝光。

電影都係由古天樂、林峯、宣萱、郭羨妮擔演，不過戲中多咗個神秘角色Ken，仲未知邊個飾演呢個角色。故事同電視劇一樣由現代開始，講述Ken因為一場多年前嘅冤獄，要穿梭時空回到秦朝改變歷史，以彌補失去咗嘅人生。當時項少龍一家已經歸隱田園，而嬴政又一統六國，看似天下太平，但喺呢個時候穿梭時空嘅Ken突襲，令秦王嬴政再次搵師傅項少龍幫忙。

喺宣傳片中，短短幾句對白都已經十分剌激, 嬴政對項少龍話：「邊個唔信我，本王就殺邊個。」項少龍話︰「你可唔可以放過我一家人？」嬴政又話︰「如今係你家鄉嘅人唔放過寡人，你仲有當寡人係徒弟咩？最後嬴政揮劍剌向項少龍話：「所有恩怨從此了斷。」

雖然未知電影幾時先上畫，但宣傳片及劇照出街後，唔少網民已經話好期待。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！