【電影LOL•哥哥逝世17年】《霸王別姬》南韓台灣再現銀幕 香港觀眾無緣一睹風采

·3 分鐘文章

不經不覺17年。2003年香港人面對沙士疫症,抗疫不安嘅同時,喺愚人節接到震撼彈 ─ 哥哥張國榮離世嘅消息。當時無數人都希望只係愚人節惡趣味玩笑,可惜事與願違,自始4月1日無心開玩笑,只有黯然神傷。哀悼香港失去一代巨星,一位紅遍日韓東南亞等地、華人必識嘅頂級歌影視巨星。

17年後今日,香港再次面對疫症,新型冠狀肺炎比沙士威力更猛,全球都受疫情影響。今日嘅香港人要面對比17年更嚴峻嘅困境:疫症、爆煲嘅醫療系統、經濟問題、政府管治問題、媒體質素每況愈下。種種困難當前,更令人懷念香港仲有張國榮嘅年代,如果哥哥仲喺度會點呢?

今年因為新冠肺炎,連每年一度於文華酒店舉行哀悼張國榮逝世活動都要取消,可幸榮迷唔會因此忘記哥哥,有心嘅榮迷特別搵畫家阮大勇兒子阮繼增繪畫哥哥畫像,製作成巴士車身廣告以表思念。

香港戲院因為新冠肺炎要停業14日,無法於大銀幕重溫哥哥代表作,不過於南韓及台灣等地,片商特別於4月1日重新上映《霸王別姬》。電影改編自李碧華同名小說,由陳凱歌執導,由張豐毅、鞏俐及哥哥主演,其中程蝶衣一角原屬另一演員飾演,後來因為檔期問題,加上哥哥自己爭取,先成就如此驚豔、無可取代嘅程蝶衣。

故事講述程蝶衣自幼被賣到京戲班學唱青衣,與師兄段小樓合演《霸王別姬》而成為名角,卻也假戲真做,身陷真假曖昧的假鳳虛凰情感之中;十年後,小樓愛上女子菊仙(鞏俐飾),悲傷的蝶衣跟隨富有的袁四爺(葛優 飾)。歷經文革變動,遭遇感情與人生的雙重背叛,當他十一年後再演《霸王別姬》,不願夢醒的程蝶衣,只願留在夢中,像虞姬永遠倒在血染的愛情裡,從一而終。

當年《霸王別姬》獲得康城影展金棕櫚大獎、金球獎最佳外語片、英國演藝學院最佳外語片(BAFTA)及提名奧斯卡最佳外語片殊榮,仲被《時代雜誌》選為100套經典電影之一,非常威水!香港朋友今年無緣大銀幕欣賞《霸王別姬》,不過相信疫情過後,會再有機會通過電影重溫哥哥嘅風華絕代。

更多電影文章

【電影LOL•留家抗疫】日劇《昨日的美食》拍電影版 未上畫先睇劇學整抗疫住家菜

【電影LOL】防疫措施下戲院關門 買咗飛可以點退票?

【電影LOL】今個星期睇咩戲! 《無痛斷捨離》《喋血戰士》《乾杯!清酒女流》

【電影LOL】泰片《無痛斷捨離》 丟得走信物 丟唔丟到段回憶?

寸爆政圈兼食正肺炎話題《逃出立法院》打爆喪屍政客光復議會

法國疫情失控 康城影展改期 參展片難創《上流寄生族》奇蹟?