【電影LOL.外語930】Irrfan Khan《少年Pi》以外的作品《美味情書》午餐愛的故事

·2 分鐘文章

拍過《少年Pi的奇幻歷險》、《一百萬零一夜》等電影嘅印度男星Irrfan Khan,因為患有罕有腫瘤,上月底於印度辭世,終年53歲。

千禧年後世界各地本土電影走向國際,韓片以外,印度電影亦打出亞洲,不少印度演員開始為人所認識。人稱「寶萊塢之王」的Shahrukh Khan以外,尚有實力派的Irrfan Khan。

《少年Pi》以外,Irrfan Khan仲有一套相當動人嘅作品《美味情書》(The Lunchbox)。

講呢套戲之前,先介紹一下印度送飯制度。喺孟買,當地人會搵人幫手將屋企人便當送到工作地點,食完又會送返個飯盒返屋企。外人睇落呢個送飯制度(dabbawala)複雜混亂,但係原來相當有系統,出錯機會極低,連哈佛大學、多間物流企業以及英國查理斯王子,都去到孟買親身了解。

《美味情書》就係以呢個制度嘅一次出錯所引發。年青婦人Ila同老公感情變淡,冀望「留住佢個胃,留住佢個心」,每日準備美味午餐。有日,dabbawala將Ila個飯送咗去行將退休嘅公務員Saajan手上。Saajan嘅工作枯燥乏味,喪妻加上臨近退休,人生更加進退失據。2個寂寞人,開始透過午餐盒同便條互相傾訴。如果「留住佢個胃」真係「留住佢個心」,Ila同Saajan因午餐盒擦出嘅小火花,最後有冇機會燃起?

呢套戲雖然係2013年上畫,但係好適合而家睇 — 睇完舒舒服服(呢樣嘢好緊要,尤其睇完新聞),覺得好似去咗一次印度旅行咁;而且,呢期匿喺屋企煮咗咁多餐,《美味情書》提醒你煮食唔止係為咗消閒,唔多唔少都係為至愛嗰幾位,包括自己。愛自己,人生先有味道。

《美味情書》5/16(星期六)晚上8:30 viuTV播映

更多電影文章

【電影LOL】今個星期睇咩戲 《女神撞正基OL》《我們永不言棄》《EMMA:上流貴族》《野種》

【電影LOL】戲院難做 傳Amazon想收購AMC院線

電影LOL】荷里活大片改期 奇洛李維斯一年四套戲美夢幻滅

【電影LOL.第39屆香港電影金像獎】《少年的你》奪8獎成大贏家 太保周冬雨成影帝影后

【電影LOL】抗疫措施解禁 戲院重開 一文睇晒睇戲優惠