【電影LOL.外語930】Pixar動畫大人化序章《玩轉腦朋友》

·3 分鐘文章

好多人睇完最新一套《數碼暴龍》大電影都話喊到收唔到聲。當八九十後都已經長大成人,睇卡通大嘅一群變成主要電影觀眾層,動畫電影一早唔止係拍俾小朋友睇。好似今年迪士尼/Pixar嘅壓軸出品Soul,直情係講靈魂同輪迴轉世。

如果要數返呢種「大人風」嘅起源,不得不提2015年嘅《玩轉腦朋友》(Inside Out)。故事主人翁係11歲女孩Riley,佢同屋企人由明尼蘇達州搬到大城市三藩市,生活截然不同。而Riley腦內嘅5位情緒專員-阿樂、阿愁、阿燥、阿憎同阿驚,各自按照新生活嘅處境,操控Riley嘅身體反應同行為。幾個專員爭住控制大腦總部,令Riley居然決定離家出走返回明尼蘇達州!

《玩轉腦朋友》以形象化的方式,向觀眾講解情緒、記憶、個性等嘅相互關係,而呢啲說法共唔係憑空想像,創作團隊搵咗心理學嘅學者攞料,將人嘅幾種主要情緒,化身成「情緒專員」;以及事件發生後,大腦點樣將印象轉為記憶,編劇就用記憶球、個性島、堆填區等設定帶出呢種運作。

向來動畫片都提倡簡單、單一嘅訊息,《玩轉腦朋友》最突破之處係透過阿愁對建立核心記憶的作用,令觀眾理解到唔止得快樂呢種情緒,先至對一個人有益。需知道「開心」同「正能量」往往係大眾娛樂作品成日提倡要追尋嘅價值觀,莫講話小朋友,唔少大人都會認為阿樂先應該係主導大腦嘅重點人物,《玩轉腦朋友》就嘗試提醒各種情緒都有其作用。再深入一啲睇,Riley追求快樂,先係佢不快樂嘅起因。

迪士尼/Pixar呢類大人風作品,未必有《反斗車王》、《反斗奇兵》嘅角色咁受小朋友歡迎,透過周邊產品再搵一「浸」,但係睇返《玩》以1億幾美元成本收返全球8.5億票房,以至後來嘅《玩轉極樂園》都叫好叫座,似乎可以預計年尾嘅Soul,如果冇受疫情影響,成績怕且唔錯。

更多電影文章

【電影LOL】今個星期睇咩戲《1/2的魔法》《熟女愛漫遊》《遺產繼承人》《希特拉偷走我的粉紅兔》《日間演奏散場時》

【電影LOL】樣衰笑匠Will Ferrell 新戲扮冰島band友搞邊科?

【電影LOL】下年奧斯卡延期4月舉行 《潛行凶間》大導新作暑假面世救市

【電影LOL】畢彼特新片 華裔女星爭演荷里活傳奇女星黃柳霜

【電影LOL】事業愛情皆得意 奇洛李維斯轉性拍喜劇演騎呢中坑band友