雅虎香港新聞 【電影LOL】《大白鯊》25呎道具鯊魚復修完成 放入電影博物館
大導演史提芬史匹堡嘅作品《大白鯊》，可以話係開創一代驚慄片先河，邊個夠膽話睇完唔驚去沙灘游水先？1975年上映嘅《大白鯊》，以9百萬成本，喺全球狂收4億7500萬票房，叫座之餘亦有口皆碑，贏得3項奧斯卡金像獎，仲入圍最佳影片；而《大白鯊》仲入選美國電影學會嘅「百年百大電影」，更獲選為「百大驚慄片」第2位，僅次於希治閣嘅《觸目驚心》（Psycho)。
正正因為套戲夠晒江湖地位，籌備中嘅美國電影學院博物館（Academy Museum of Motion Pictures）將會擺放《大白鯊》戲中嘅25呎長道具鯊魚，向呢套經典致敬。
話說當年劇組一共製作咗4條道具鯊魚，其中3條以乳膠及橡膠製成嘅喺電影殺青之後已經損毀，剩返用玻璃纖維整成、工作人員叫佢做Bruce嘅鯊魚「倖存」，喺1975－1990年間被放置喺美國環球影城，「退役」之後就被送到一間劏車場。2016年，連劏車場都關門大吉，老闆將Bruce交俾電影學院博物館，聲明提到原來當年買下Bruce嘅劏車場第一代老闆，喺環球片場對Bruce「一見鐘情」，所以決定捐出咁有價值嘅展品俾博物館。
近日博物館做好修復工作，將Bruce高高掛起，預計下年4月開幕之時，遊客就可以入場免費欣賞佢嘅血盆大口！講開又講，博物館原定2017年開幕，而家遲足4年，原因梗係唔止疫情啦。2年前Variety就報導過，同時係奧斯卡頒獎禮主辦單位嘅美國電影學院，為博物館進行嘅籌款未能達標，比起目標金額3億8800萬美元差近1億元。希望喺水中世界夠晒霸氣嘅Bruce可以為博物館強力吸水啦。
更多電影文章
【電影LOL】今個星期睇咩戲《無聲》《怪胎》《無價之寶》《夜香‧鴛鴦‧深水埗》《凶屋32》
【電影LOL】范冰冰聯同國際級女星壓陣 The 355押後一年上映
【電影LOL】香港電影金馬獎得獎 《夜更》《迷航》2種抗爭角度
