雅虎香港新聞 【電影LOL】《神奇女俠2：1984》鐵定聖誕檔 銀幕串流平台同步上映
傳完又傳，《神奇女俠2：1984》終於鐵定於聖誕節上映！荷里活多部大片因為新冠疫情全部改期，有好幾部電影個片期改完又改，得《天能Tenet》不顧一切喺過去嘅9月於大銀幕登場，《007：生死有時》原本11月上映，最後都係決定改到下年。
戲院因為無哂商業巨片吸引人流好頭痕，其實一眾片廠又何嘗唔頭痛？每改一次片期意味要重新製作所有宣傳物料 ，廣告落咗又無辦法唔找數，一日唔上一日都封唔到道蝕本門，但多國疫情嚴重，勇字當頭照原定計劃上映，又分分鐘血本無歸，戲院呢類娛樂場所隨時因為疫情要停業，而已經多次改期嘅《神奇女俠2：1984》面對一樣嘅掙扎。
華納9月決定上《天能Tenet》，一來係應導演Nolan嘅要求，二來當時疫情稍稍緩和，唔想失咗個暑假檔，結果全球票房埋單3億5300萬美金，不過比起Nolan以往《星際啟示錄》（6億9600萬美金）《鄧寇克大行動》（5億2600萬）、《潛行凶間》（8億3600萬） 紀錄就差幾多下！當時華納高層仲暗寸迪士尼將《花木蘭》直接擺上自家串流平台Disney+，話唔明迪士尼諗咩喎！
結果證明好多人怕咗新冠病毒唔敢入戲院，寧願俾錢入會再俾多30蚊美金睇《花》，單係上Disney+為迪士尼帶嚟2億6000萬美元收益，唔駛同戲院分，利潤好過《天能Tenet》多多聲！迪士尼靈活又快手轉陣上戲又成功之後，間間片廠照跟，大把戲轉賣俾Netflix、Amazon Prime同apple tv，收返嘅版權費好過蝕到入肉！
眼見依家呢個時勢單上戲院吸金有限，華納決定《神》如期12月上映，疫情穩定嘅地區就行傳統方法於戲院大銀幕上映，而疫情嚴重譬如美國，就會喺戲院同串流平台HBOmax同步上映，唯一同迪士尼唔同做法，就係HBOmax唔會另外收費，只要係訂閱客戶就有得睇！
香港地區就無得用HBOmax睇，但呢個消息對香港觀眾係喜訊，因為只要今個聖誕戲院能夠正常營業，我咃一定可以喺大銀幕欣賞《神奇女俠2：1984》！
更多電影文章
【電影LOL】荷里活最環保嘅迪士尼又一翻拍之作 今次輪到史迪仔套《扮嘢小魔星》
【電影LOL】梅麗史翠普12月又有新戲 Let Them All Talk冇劇本盡見演員功力
【電影LOL】《鬼滅之刃劇場版》香港開畫收過300萬 鍊贏大片《天能》做年度開畫冠軍
