【電影LOL】0成本勇奪全美票房冠軍 呢套Unsubscribe原來係咁拍!

·3 分鐘文章

做邊行都好,打工仔女返工一定聽過呢句︰冇budget呀。而家市道唔好,更加係日日都要面對上頭交俾你「無米煮限飯」嘅任務。

冇budget係咪就冇貨賣?講求創意嘅電影圈,低成本刀仔鋸大樹嘅例子比比皆是,日本片《屍殺片場》就以3百萬日元成本,埋單大賺28億!

最近有套戲更犀利,直情係以0成本,成為美國全國開畫票房冠軍!

呢套叫Unsubscribe嘅電影,片長29分鐘,用大家都好熟悉嘅軟件zoom拍攝。6月中上畫,以25488美元票房,成為全國冠軍。幕後主腦分別係Youtuber Eric Tabach以及電影人Christian Nilsson。

當3月新冠肺炎全球爆發,唔少電影因為戲院關門而要延期上畫,製作都因疫情停頓,電影行業步入前所未見嘅冰河時期。Eric 同Christian 反而睇到機會︰既然大片讓路,票房5位數字都冇,不如細細地搏一鋪 - 做一次票房冠軍!

首先要了解個遊戲點玩︰電影行內有個叫four walling嘅做法,大致係發行商直接同戲院租場,然後所有票房收入都歸租貸人。只要佢地拍咗一套戲,成功租到戲院兼放映,再自己買起晒啲飛,當全世界戲院都冇開,一套全日「爆滿」嘅戲即使只有幾萬蚊票房,都足以成為全國之冠。

咁即係要至少拍到一上到畫嘅套戲啦。Christian 用一日時間寫好劇本,再搵有幕前經驗嘅朋友拍膊頭演出,故事係講5位Youtuber開zoom傾計,結果遇到恐怖事,係一套驚慄片。拍攝時間只需5日,加埋後期製作同配樂(都係拍朋友膊頭幫手),幾個禮拜就搞掂。

Christian將套戲放喺紐約一間以前打過工嘅戲院上映,「開畫」日仲同拍檔一齊著晒「踢死兔」出席。當日套戲上映5場,觀眾只有佢地2個!

仲有最後一關要過!為咗令票房網站確認成件事並非吹水,佢地send晒演員劇照俾有關方面,加上開始有新聞介紹套戲,最終獲得官方認可,以2萬幾蚊票房勇奪票房no.1!而家套戲放咗上網俾大家收睇,咁梗係要課金啦。(網址︰https://vimeo.com/ondemand/unsubscribefilm

難怪話荷里活係夢工場,想做票房冠軍?食腦就得!

更多電影文章

【電影LOL.外語930】逃亡教學指南 《Argo救參任務》

【電影LOL】今個星期睇咩戲 《幻愛》《無名勳章》《惡‧迴家》《緣來客運站》《這一刻,想見你》

【電影LOL】《幻愛》 談一場疑幻似真嘅愛情

【電影LOL】天之驕子變過街老鼠 竟然有人想拍《孫楊傳》?

【電影LOL】康城影展有入圍冇獎頒 香港7大導作品《七人樂隊》入選