【回顧2020.娛樂】2020全球搜尋量最高十大電影 《上流寄生族》居首

·3 分鐘文章

年尾又係大事回顧嘅時間,日前Google就公布咗2020年各項年度大熱搜尋名單,由世界大事、音樂、演員咩都有。綜合全球數據,今年最多人搜尋嘅演員係Tom Hanks,第2名係《小丑》影帝Joaquin Phoenix,第3名係印度知名演員Amitabh Bachchan。Joaquin Phoenix年初憑《小丑》成為奧斯卡影帝,多人搜尋唔出奇,第1及第3名本身都係知名巨星,不過今年作品唔算出眾,上榜原因相信同2位影星感染新冠病毒有關,Bachchan於Twitter上公開自己確診嘅帖文,仲成為印度2020年最多人轉載嘅tweet!

至於全球10大最多人搜尋電影名單,部份理所當然部份又幾估唔到喎。第1位係由奉俊昊執導嘅南韓片《上流寄生族》,電影於今年國際影壇大放異彩,更獲得奧斯卡金像獎最佳國際影片、最佳原創劇本、最佳導演及最佳電影等4項大獎,破哂奧斯卡多年英語片主導嘅局面。一如導演自己嘅得獎感言,只要肯追字幕,電影世界會大好多!榮登年度榜首,相信係有唔少觀眾好奇呢套零英語對白嘅奧斯卡大贏家有幾好睇。

第3位有《黑豹》。電影於2018上映時話題度十足,因為係首次由全黑人演員擔正演出嘅超級英雄電影,今年男主角Chadwick Boseman因病離世,加上美國black lives matter運動,令「黑豹」呢位黑人正義英雄再次成為熱話。另一套上榜作品仲有2011年電影《世紀戰疫》,全球飽受新冠疫情折磨,新病毒、傳播性高,情節同《世》異常接近,多人搜尋唔意外。

十大之中比較意外嘅有波蘭首套情色電影《禁室365天》,電影被形容為波蘭版嘅《格雷的五十道色戒》,劇情講述黑幫大佬綁架靚女要佢365日後愛上自己,其中嘅床戲比《格》更火辣,意外令《禁》成為熱搜第4位,因為直接喺Netflix度有得睇哂成套戲,google反而睇唔到肉博戲肉架喎!

另一套意外多人搜尋嘅電影一樣由Netflix出品,由《怪奇物語》Millie Bobby Brown、「超人」Henry Cavill、《飢餓遊戲》Sam Claflin及《皇冠》Helena Bonham Carter主演嘅《天才少女福爾摩斯》。電影cast算大,不過《天》又唔算好有noise,但原來暗地好多人搜尋相關資訊!

今年受疫情影響,多部荷里活大片改期擇日再上,所以個10大名單得1半係新片,得3套戲喺戲院大銀幕上過,分別為《猛禽暴隊:解瘋小丑女》、《天能Tenet》及《花木蘭》!希望2021年嘅回顧會精彩啲啦!

全球10大最多人搜尋電影:

1) 《上流寄生族》

2) 《1917:逆戰救兵》

3) 《黑豹》

4) 《禁室365天》

5) 《世紀戰疫》

6) 《天能Tenet》

7) 《天才少女福爾摩斯》

8) 《猛禽暴隊:解瘋小丑女》

9) 《花木蘭》

10) 《陽光兔仔兵》

更多電影文章

【電影LOL】三代蜘蛛俠蜘蛛女新版《蜘蛛俠3》碰頭 八爪博士再現

【電影LOL】明年新片戲院網上同步上映惹非議 華納得罪《天能》導演 伙伴擬入稟阻撓

【電影LOL】Monster Hunter電影版 因為MC Jin 一句對白被指「辱華」要立即落畫

【電影LOL】華納宣布明年新片 戲院、網上同步放映

【電影LOL】男神Benedict搭影后Jodie Foster The Mauritanian踢爆美軍不人道一面

【電影LOL】Ellen Page宣佈成為跨性別人士改名Elliot 細數歷年好戲力作

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能