【電影LOL】一線阿姐Emily Blunt +金像編劇 拍節日電影Wild Mountain Thyme竟然失手?

·3 分鐘文章

由於現實生活太沉重,偶爾需要睇浪漫喜劇嚟逃避現實,每年聖誕歐美都有大量感覺良好嘅節日電視電影,Hallmark頻道出最多,其他串流平台都唔弱,Netflxi自家出品都有幾套,呢類節日電影都有一個共通點:劇情似《愛.回家》、男女主角一定錯摸、誤會,幾日相處後發現對方係真愛,最後有情人終成眷屬,而主角們嘅人生難題往往因為覓得真愛就一掃而空。

老土還老土,不過節日電影無血腥場面、無生離死別兼一定有靚景仲保証大團圓結局,確實好啱用嚟放空。但係我又估唔到一線影星、拍過《異空戰士》同《無聲絕境》嘅Emily Blunt,連同《格雷的五十道色戒》Jamie Dornan及《捉智雙雄》老戲骨Christopher Walken竟然會一齊拍婆媽愛情喜劇Wild Mountain Thyme!

故事講述於愛爾蘭農莊成長及生活嘅Rosemary(Emily Blunt飾)一直鍾情於鄰居Anthony(Jamie Dornan飾),鍾意到非君不嫁咁滯。不過Anthony異常木訥,同Rosemary由細玩到大卻一直唔察覺女方對佢嘅傾慕。Anthony父親Tony (Christopher Walken飾)無信心將個農場交俾個仔繼承,計劃將地賣俾住喺紐約嘅有錢外甥Adam(Jon Hamm飾演),因為Adam嘅出現終於令Rosemary嘅單戀故事出現變數。

咁話到明係節日電影,咁結局一定毫無懸念,Rosemary情歸Anthony!Wild Mountain Thyme有趣在於成個setting好離地,包括Rosemary同Anthony 已經年經40歲,女主角仲話要雪卵都要等Anthony愛上自己,但係戲中Anthony唔係霸道總裁而係一個內向、不擅辭令又傻氣嘅農夫,除左外貌(well, Jamie Dornan點扮傻豬豬都係靚仔一個),我睇唔到Rosemary死心塌地愛佢嘅理由!

不過套戲最多人討論係各演員嘅口音!既然係愛爾蘭土生土長農莊主人,戲中人物理應操愛爾蘭口音,不過口音唔係一定學咗就講得似,結果父子口音不同、同隔離鄰居又唔同,唔少愛爾蘭觀眾反映聽到錯亂,又為幾位演員尷尬,因為啲口音扮得好唔似咁話!

而且劇情都幾多犯駁位,Rosemary成世都係住愛爾蘭,連農莊度門都少出,認識Adam唔夠幾日就衝去紐約見識見「色」!你以為Tony唔留農場俾個仔係另一條劇情主線,點知戲未到一半,家產問題就解決咗,父子又無開門見山交流心底話㗎喎!最離奇,呢套劇情平舖直序又有少少悶嘅戲,出自憑《聖訴》獲得奧斯卡金像獎最佳劇本嘅John Patrick Shanley手筆,由佢親自包辦劇本及導演。

戲雖然一般,不過作為應節電影都ok嘅,至少睇下愛爾蘭、紐約美景當去左旅行都好,同埋Jamie Dornan扮毒男都幾好笑!

更多電影文章

【電影LOL】《權力遊戲》拍2套前傳 一套爛到要抽起 另一套不容有失

【電影LOL】Netflix 拍《幽遊白書》真人版 會唔會又崩壞?

【回顧2020.娛樂】英電影雜誌票選年度最佳50部電影 《天能》都係排38 三甲好有文青feel

【電影LOL】因新冠肺炎病逝 三大影展得獎大導 金基德重要作品回顧

【回顧2020.娛樂】2020全球搜尋量最高十大電影 《上流寄生族》居首

【電影LOL】三代蜘蛛俠蜘蛛女新版《蜘蛛俠3》碰頭 八爪博士再現