【電影LOL】下年奧斯卡改規則轉形式 務求有獎頒

·3 分鐘文章

美國奧斯卡金像獎每年風雨不改於2月舉行,不過因為受新冠病毒疫情影響,原定美國時間2021年2月28日舉行第93屆金像獎,都有機會要改期或者換個形式!

根據外媒Variety報導,奧斯卡好大機會延期舉行,主要原因係今年受疫情影響,戲院停業,眾多電影因此未能如期上映,片期大亂,戲都無上過又好難攞提名!不過,疫情引起嘅不明朗因素實在太多,又唔想取消頒獎禮,所以大會都特別為今屆修改相關入閘規定。

以往提名電影必須於洛杉磯地區戲院上映至少7日或以上,今年就唔駛。為咗支持一眾電影人嘅心血,只要電影本身有計劃於戲院上映,就算後來於串流平台播映都獲提名資格。大會仲放寬咗地區限制,唔止洛杉磯,喺紐約、芝加哥、邁亞密、亞特蘭大及灣區等地戲院上映過,一樣可以報名參賽。

唯一未知嘅係會唔會放寬個報名日期。以往片廠為咗增加提名機會同聲勢,都會有計劃地安排電影於10月、11月左右上映,除咗安排電影於戲院正式公映,奧斯卡造勢之路仲包括各大國際影展,由2月柏林影展、5月康城到9月多倫多影展,每次參展都係製造口碑嘅機會。可惜今年好多影展都因為新冠疫情取消咗,而同一時間又無人可以確定北美地區戲院幾時重開,加上片期大亂,真係考起一眾片廠同埋電影公司負責排片同造勢嘅大員!

其實近年奧斯卡收視每況愈下,搵唔搵名嘴主持都救唔到收視,因為頒獎禮越嚟越小圈子,代表嘅價值觀又跟唔切社會變化,年輕影迷明顯唔多關心奧斯卡賽果。不過作為全球盛事,奧斯卡仍有一定影響力,好似今屆《上流寄生族》成為大贏家,確實有助非英語嘅亞洲電影打開更廣闊嘅電影市場。係架,其實好多外語片好睇過美國荷里活出品,不過佢規模夠大又夠星光,自然最受關注。

奧斯卡好睇在有大量業界人士包括荷里活影星、導演、台前幕後等等著靚靚出席,加上一大堆工作人員先可以順利舉行頒獎禮,計落絕對係高風險群眾聚集活動。既然收視失勢,製作費又貴,大會不妨考慮下轉個形式舉行,好似剛剛舉行嘅香港電影金像獎咁網上直播,15分鐘公布得獎名單,簡單直接又唔駛聽啲好夾硬嘅tag同唔好笑嘅gag,又環保啲,咪幾好!

更多電影文章

【電影LOL】青春愛情片《律政俏佳人》18年後再拍新一集 仲可以點玩?

【電影LOL】冇新片好在仲有經典《蝙蝠俠》三部曲、《十二夜》再現大銀幕

【電影LOL】今個星期睇咩戲 《孤城淚》《冰血殺機》《火口的二人》《又要威,又要除頭盔2》

【電影LOL】好啱呢期睇!新片Bad Education踢爆作育英才嘅斯文敗類

【電影LOL】戰鬥民族癲喪暴力黑色喜劇 《睇你幾時死!》惡警私了古惑仔