【電影LOL】《中國女排》變《奪冠》三日收一億人仔 網友狠批︰將網路搜尋結果拼埋一齊

本來屬於賀歲檔嘅《奪冠》,因為新冠疫情關係改到依家中秋國慶檔上映。可能因為改期嘅關係,連啲宣傳都大幅改動,片名由《中國女排》改成《奪冠》,賀歲檔版本海報大賣熱血、賣中國女排成員有幾搏命,定位近乎民族英雄熱咁!

電影時空跨度都幾大,戲中重現多場重要國際排球賽事,包括1981年打敗日本隊首次登上世界錦標賽冠軍、北京2008奧運女排中美對陣的賽事、2016里約熱內盧奧運中國女排逆風奪冠;其中里約賽事中國對巴西隊一役,更邀得中國參與里約奧運的冠軍隊隊員集結演出。

主要透過中國女排三個年代的光影事蹟,講述中國女排30多年頑強拼搏的奮鬥歷程,聽落好正面,非常符合內地「主旋律」要求。《奪》被安排於內地9月25日上映,因為無其他對手加上國慶假期,首日開畫收人民幣5400萬票房,第二日就破億,3日已經收咗1.73億人仔票房,估計埋單可以收到10億!

當年中國女排的確好威水,亦係當年中國隊少數可以於國際體壇可以奪金嘅運動。大家仲會死守電視好肉緊咁睇比賽,所以幾年前宣布陳可辛開拍中國女排嘅故事,仲搵霸氣外露嘅鞏俐飾演郎平,觀眾甚為期待!

等咗咁耐終於有得睇,於內地影評網豆辦仲有平均7.3高分,不過奇妙在套戲其實評價相當參差,包括將「中國女排」拍成「郎平傳」,不斷強調第一代球員們有幾刻苦,但介紹隊員時個個都無名得個號碼,直到「郎平」出場先有介紹「這是郎平」!

另有唔少評價形容電影剪得零碎,不過並非指《奪》重現幾個重要賽事所以時空跳嚟跳去,而係後期夾硬修改嘅痕跡非常明顯,睇同聽得出大量台詞係重新配音,因為對唔上嘴型!仲有網友評價套戲似將百條「百度搜尋」結果拼埋一齊!

不過最juicy嘅都係評論堆中爆料,國家體育局排球運動管理中心不滿片中內容,出手干預;另一邊廂又傳女排成員唔願意支持,加上前中國國家女子排球隊主教練陳忠和(戲中由黃渤飾演)嘅抵制,人人都有意見嘅情況下變成幾不像!

《奪冠》係陳可辛導演自2016年《親愛的》後相隔4年再次執導新作,「中國女排」咁大個金漆招牌兼帶住幾代人回憶,理應好易拍出套賺人熱淚、熱血勵志嘅運動片,可惜喺內地拍戲經常因為攞審批而要修剪,好難講《奪》最終版本有幾多係官方意見,幾多係創作人意願。

嚟緊陳可辛仲有另一部運動片《李娜》,呢位前中國女子職業網球選手職業生涯爭議不斷,曾點名批評國家隊體制,又發表過「打球不是為了國家,是為了自己」等言論。如果忠實呈現咁唔聽話嘅李娜,《李娜》會唔會變禁片?

更多電影文章

【電影LOL】今個星期睇咩戲 《電影多啦A夢:大雄之新恐龍》《奪冠》《南非救參任務》《我的豪爸爸》

【電影LOL】香港電影金像獎順延一年舉行 大片爭崩頭!

【電影LOL】竹內結子逝世 回顧2套盡顯演技電影作品

【電影LOL】《花木蘭》有錢賺 迪士尼唔敢搏《黑寡婦》延期上畫

【電影LOL】金馬創投會議新劇曝光《歎息橋》班底有新作 《紅Van》拍完電影再拍劇 執好爛尾原著

電影LOL】政府電檢部門 要求抗爭紀錄片加入警告字眼

【相關搜尋】奪冠電影

【相關搜尋】吳君如鞏俐重逢

【相關搜尋】郎平自傳